මහියංගනය රජමහා විහාරාස්ථානයේ පෙරහැර සඳහා රැගෙන ගොස් සිටි මහරගම සීතා නැමැති ඇතින්නට වෙඩි තැබීම සිදුකර ඇත්තේ සිවිල් ආරක්ෂක බලකා නිලධාරියෙක් බව පොලිසිය පවසනවා.
අද (30) පෙරවරුවේ කැඳවා තිබූ මාධ්‍ය හමුවේ දී පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි නිහාල් තල්දූව මේ බව සඳහන් කළා.
අදාළ සිවිල් ආරක්ෂක බලකා නිලධාරියා වනජීවී නිලධාරීන්ට අනියුක්තව සේවයකරන අයෙක් බවයි පොලිස් මාධ්‍ය ප්‍රකාශකවරයා වැඩිදුරටත් සඳහන් කළේ.
වෙඩි තැබීම සිදුකළ වයස අවුරුදු 43ක සිවිල් ආරක්ෂක බලකා නිලධාරියා අත්අඩංගුවට ගෙන ඇති අතර, ඔහු මාපාකඩ වැව වනජීවී කාර්යාලයට අනුයුක්තව සේවය කරන බවයි අනාවරණය වී ඇත්තේ.
ඔහු අධිකරණය හමුවට ඉදිරිපත් කිරීමට නියමිතව ඇති බව පොලිස් මාධ්‍ය ප්‍රකාශකවරයා වැඩිදුරටත් සඳහන් කළා.
මෙම වෙඩි තැබීමෙන් ඇතින්නගේ ඉදිරිපස කකුල ආසන්නයට තුවාල සිදුව ඇති බවත් ඇතින්නට ජීවිත අනතුරක් නොමැති බවත් පොලිස් මාධ්‍ය ප්‍රකාශකවරයා පැවසුවා.
මෙම වෙඩිතැබීම සිදුකිරීමට යොදාගෙන ඇත්තේ ජීව උණ්ඩ ද නැතහොත් රබර් උණ්ඩ ද යන්න පිළිබඳව තවමත් අනාවරණය වී නොමැති බව ද ඔහු සඳහන් කර සිටියා.
මේ අතර අදාළ වෙඩි තැබීම සම්බන්ධයෙන් වනජීවී සංරක්ෂණ දෙපාර්තමේන්තුව විශේෂ නිවේදනයක් නිකුත්කර තිබුණා.
