තලංගම ප්‍රදේශයේ ලැඟුම්හලක දී ඝාතනයට ලක් වූ මනෝ උපදේශකවරියගේ අනන්‍යතාවය හෝ ඝාතකයා සම්බන්ධයෙන් මෙතෙක් කිසිදු කරුණක් අනාවරණය වී නොමැති බව තලංගම පොලීසිය පවසනවා.
ඒ, හේතුවෙන් සුජාතා මුණසිංහ මානාභරණ නැමති මනෝ උපදේශකවරියගේ සිරුර දින 08ක් පුරා කොළඹ පොලිස් මෘත ශරීරාගාරයේ තැම්පත් කර ඇති බවයි පොලීසිය පැවසුවේ.
ඝාතනයට ලක් වූ මනෝ උපදේශකවරිය පසුගිය අගෝස්තු මස 26 වනදා පුද්ගලයකු සමඟ තලංගම ප්‍රදේශයේ ලැඟුම්හලක පැමිණ තිබුණා.
පසුව ඇය සමග පැමිණි පිරිමි පුද්ගලයා පසුගිය 03 වනදා ලැඟුම්හලින් පිටත්ව ගොස් තිබූ බවයි අනාවරණය වී ඇත්තේ.
කෙසේ වෙතත් 03 වනදා දහවල් කාලයේ සිට අදාළ කාන්තාව පෙනීමට නොසිටී බැවින් ලැඟුම්හල් සේවකයන් විසින් ඉන් පසුදිනයේ කාමරයේ දොර කඩා සෝදිසි කිරීමටයි කටයුතු කර තිබුණේ.
එම සෝදිසි කිරීමේ දී කැපුම් තුවාල සහිතව මෙම කාන්තාවගේ සිරුර කාමරයේ ඇඳ මත තිබෙන අයුරු දැක ඒ සම්බන්ධයෙන් පොලීසියට දැනුම් දීමට ලැඟුම්හලේ සේවකයන් කටයුතු කර තිබුණා.
ඝාතනයට ලක් වූ මෙම මනෝ උපදේශකවරිය යුද්ධය පැවති සමයේ පොලීසියේ සහ ත්‍රිවිධ හමුදාවේ නිලධාරීන්ගේ චිත්ත ධෛර්යය නැංවීම සඳහා මනෝ උපදේශන කටයුතුවල නියැළුණු තැනැත්තියක් බවට ඇයගේ ඡායාරූප සමඟ පළ වූ පුවත්පත් වාර්තාවලින් අනාවරණය වී ඇති බවයි පොලිසිය පවසන්නේ.
මෙම කාන්තාව රැඳී සිටි බව කියන වීරකැටිය, හපුතලේ හා උනවටුන ආදී ප්‍රදේශවලින් ද ඇය පිළිබඳ තොරතුරක් දන්නා පුද්ගලයන් හමු වී නොමැති අතර, ඇය පරිහරණය කළ ජංගම දුරකථන සිම් කාඩ්පත ද ලබාගෙන ඇත්තේ වෙනත් පුද්ගලයෙකුගේ හැඳුනුම්පතකට බව පොලිස් විමර්ශනවලදී අනාවරණය වී තිබෙනවා.
මේ අතර මනෝ උපදේශකවරියව ඝාතනය කළ බවට සැක කෙරෙන ඇයගේ සැමියා යැයි පැවසෙන පුද්ගලයා පොලීසියට ලියන ලද පිටු පහකින් යුත් ලිපියක් ද ලැඟුම්හලේ කාමරයේ තිබී පොලිසියට හමුව තිබුණා.
ඝාතකයා ඇගේ ගෙල කැපීම සඳහා උපයෝගි කරගත් තියුණු ආයුධය බත්තරමුල්ල ප්‍රදේශයේ වෙළෙඳසැලකින් මිලදී ගත් බවට සඳහන් බිල්පතක් ද පොලීසිය මේ වනවිට සොයාගෙන තිබෙනවා.
ඒ, අනුව එම පුද්ගලයා කවුරුන් ද යන්න හඳුනාගැනීම සඳහා විමර්ශන ආරම්භ කර ඇති බව පොලීසිය සඳහන් කළා.
තලංගම පොලිසියේ ස්ථානාධිපති ප්‍රධාන පොලිස් පරීක්ෂක රොෂාන් අනුරුද්ධගේ උපදෙස් මත අපරාධ අංශයේ ස්ථානාධිපති පොලිස් පරීක්ෂක ලක්ෂිත ඇතුළු කණ්ඩායමක් පරීක්ෂණ පවත්වනු ලබනවා.
