පේරාදෙණිය සරසවියේ හිටපු උපකුලපති, ජ්‍යෙෂ්ඨ මහාචාර්ය අතුල සේනාරත්න මහතාට සහ ඔහුගේ පුත්‍රයා ඇතුළු පවුලේ සාමාජිකයන්ට පහර දී නිල නිවසට හානි කිරීමේ සිද්ධිය සම්බන්ධ සැකකාර සිසුන් 12 දෙනා ලබන ජනවාරි මස 4 වනදා දක්වා යළි රක්ෂිත බන්ධනාගාර ගතකර තිබෙනවා.
මෙම සිද්ධියට අදාළව පේරාදෙණිය සරසවියේ මහා ශිෂ්‍ය සංගමයේ සභාපතිවරයා ද අත්අඩංගුවට ගන්නා ලෙසටයි අධිකරණ නියෝග කර ඇත්තේ.
මහනුවර ප්‍රධාන මහේස්ත්‍රාත්වරයායි මෙම නියෝගය ලබාදුන්නේ.
සිද්ධිය සම්බන්ධයෙන් පරීක්ෂණ පවත්වන අපරාධ පරීක්ෂණ දෙපාර්තමේන්තුව සිද්ධියට අදාළ මූලික විමර්ශන මෙතෙක් අවසන්ව නොමැති බව අධිකරණයට දන්වා සිටි අතර පොදු දේපළ පනත යටතේ සැකකරුවන්ට එරෙහිව කරුණු වාර්තා කර තිබු බව සඳහන්.
අද සිසුන් හඳුනා ගැනීමේ පෙරට්ටුවකට ඉදිරිපත් කළ අතර ඔවුන් හඳුනා ගැනීම සඳහා හිටපු උපකුලපතිවරයා, ඔහුගේ පුත් විදුර සේනාරත්න ඇතුළු හය දෙනෙකු ඉදිරිපත්ව සිටියා.
හඳුනා ගැනීමේ පෙරට්ටුවේ දී මහචාර්ය අතුල සේනාරත්න මහතා සිසුන් 06 දෙනෙකු හඳුනා ගත් බවයි අප වාර්තාකරුවන් කියාසිටියේ.
මෙම පහර දීමේ සිද්ධිය සම්බන්ධයෙන් මූලික විමර්ශන පේරාදෙණිය පොලිසිය විසින් සිදු කරන ලද අතර පසුව එම පරීක්ෂණ අපරාධ පරීක්ෂණ දෙපාර්තමේන්තුවට යටතට පත් කරනු ලැබුවා.
රක්ෂිත බන්ධනාගාර ගත කරනු ලැබූ සිසුන් කලා හා විද්‍යා පීඨවල අධ්‍යාපනය ලබන අතර ඔවුන් සියලු දෙනාගේ ශිෂ්‍යභාවය විශ්වවිද්‍යාල පාලනාධිකාරිය මගින් මේ වනවිට අත්හිටුවා තිබෙනවා.
