පාස්කු ඉරුදින ත්රස්ත ප්රහාරය කුමන්ත්රණය කිරීම, ආධාර අනුබලදීම ඇතුළු චෝදනා යටතේ නවුෆර් මවුලවි ඇතුළු විත්තිකරුවන් 24 දෙනෙකුට එරෙහිව නීතිපතිවරයා විසින් ගොනුකර තිබෙන නඩුවේ චෝදනා පත්ර වැඩිදුර කියවාදීම කල් තැබීමට කොළඹ ත්රිපුද්ගල මහාධිකරණ විනිසුරු මඩුල්ල අද (11) නියෝග කළා.
මෙම නඩුව අද කැඳවූ අවස්ථාවේ දී නඩුවේ විත්තිකරුවන් තිදෙනෙකු බන්ධනාගාර නිලධාරීන් විසින් අධිකරණයට ඉදිරිපත් පත් කර තිබුණේ නැහැ.
බන්ධනාගාර නිලධාරීන් අධිකරණයට දන්වා සිටියේ මෙම විත්තිකරුවන් තිදෙනා වෙනත් නඩු විභාගයක් සඳහා මඩකලපුව මහාධිකරණයට ඉදිරිපත් කර ඇති බවයි.
ඒ, අනුව වැඩිදුර චෝදනා පත්ර කියවාදීම අගෝස්තු මස 07, 09, 10 සහ 11 යන දිනයන්වලට කල් දමන බව ත්රිපුද්ගල විනිසුරු මඩුල්ල අද දැනුම් දුන්නා.
එමෙන්ම මෙම නඩුවේ නඩු භාණ්ඩ වශයෙන් නම්කර තිබෙන ටී 56 වර්ගයේ ගිනි අවි දෙකක් මඩකලපුව මහාධිකරණයේ නඩු විභාගයක් සඳහා අවශ්යව තිබෙන බවත්, පැමිණිල්ල විසින් දැනුම්දීමෙන් අනතුරුව එම ගිනි අවි දෙක අවශ්ය අවස්ථාවල අදාළ මහාධිකරණය වෙත ඉදිරිපත් කිරීමට පියවර ගන්නා ලෙසත් ත්රිපුද්ගල විනිසුරු මඩුල්ල විසින් කොළඹ මහාධිකරණ රෙජිස්ට්රාර්වරයාට නියෝග කර සිටියා.
දමිත් තොටවත්ත, අමල් රණරාජා සහ නවරත්න මාරසිංහ යන මහත්වරුන්ගෙන් සමන්විත කොළඹ ත්රිපුද්ගල මහාධිකරණ විනිසුරු මඩුල්ලක් ඉදිරියේ මෙම නඩු විභාගය පැවැත්වෙනවා.
පාස්කු ඉරුදින ත්රස්ත ප්රහාරය කුමන්ත්රණය කිරීම, ආධාර අනුබලදීම ඇතුළු චෝදනා 23270ක් යටතේ නවුෆර් මව්ලවි ,සජීඩ් මවුලවි, මොහොමඩ් මිල්හාන්, සාදික් අබ්දුල්ලා, ආදම් ලෙබ්බේ, අලියස් ගවුෆර් මාමා, මොහොමඩ් සනස් දීන් සහ මොහොමඩ් රිස්වාන් ඇතුළු විත්තිකරුවන් 24 දෙනෙකුට එරෙහිව නීතිපතිවරයා විසින් ත්රස්තවාදය වැළැක්වීමේ පනත යටතේ මෙම නඩුව ගොනුකර තිබෙනවා.
