ඉන්දීය ජාතික කණ්ඩායමේ නව වේගපන්දු යැවීමේ පුහුණුකරු මෝර්නි මෝකල්; තුන් ඉරියව් ක්‍රීඩක හර්දික් පාණ්ඩ්‍යාගේ පන්දු යැවීම පිළිබඳව නොසතුටට පත්ව සිටින බව වාර්තා වනවා.
සංචාරක බංග්ලාදේශය සමඟ ආරම්භ වීමට නියමිත විස්සයි විස්ස තරගාවලියට පෙර පැවැත්වෙන පුහුණු සැසියක් අතර තුර මෝකල්; පාණ්ඩ්‍යාගේ පන්දු යැවීම පිළිබඳව නොසතුට පළකර ඇති බවයි වාර්තා වන්නේ.
හර්දික් පාණ්ඩ්‍යා පන්දු යැවීමට ප්‍රවේශ වීම සම්බන්ධයෙන් මෝකල් නොසතුටට පත්ව සිටින බව පැවසෙන අතර, එහිදී සිදුකළ යුතු නිවැරදි කිරීම් පිළිබඳව ඔවුන් දෙදෙනා දීර්ඝ ලෙස සාකච්ඡා කර තිබෙනවා.
එමෙන්ම හර්දික් කඩුල්ලට ආසන්නයේ පන්දු යැවීම සම්බන්ධයෙන් ද මෝකල් එතරම් සතුටට පත්ව නොමැති බවයි ඉන්දීය මාධ්‍ය වාර්තා කළේ.
ඊට අමතරව හර්දික් පන්දුව මුදාහැරීමේ ස්ථානය සම්බන්ධයෙන් ද මෝකල් අවදානයෙන් කටයුතු කළ බවයි වාර්තා වන්නේ.
ග්වාලියර් හි පැවති මෙම පුහුණු සැසියේ දී හර්දික් සමඟ වැඩ කිරීමෙන් පසු මෝකල්; වමතින් වේගපන්දු යවන අර්ෂ්දීප් සිං සහ නවකයින් වන හර්ෂිත් රානා සහ මායන්ක් යාදව් වෙත අවදානය යොමුකර තිබෙනවා.
මේ අතර සංචාරක බංග්ලාදේශය සහ ඉන්දියාව අතර තරග තුනකින් සමන්විත විස්සයි විස්ස තරගාවලිය ලබන ඉරිදා (06) ග්වාලියර් හි දී ආරම්භ වනවා.
