පස් කන්දක් නාය යාම හේතුවෙන් යට වූ බලංගොඩ – වැහින්තැන්න ප්රදේශයේ පිහිටි නිවසෙහි සුන්බුන් සොයා ගැනීමට ආරක්ෂක අංශ සමත් ව තිබෙනවා.
මීට ටික වේලාවකට පෙරයි එම පස් කන්ද නාය ගිය ස්ථානයේ දීර්ඝ ලෙස මෙහෙයුම් සිදු කරමින් සිටි ආරක්ෂක අංශ නිලධාරීන් හට මෙම නිවසෙහි සුන්බුන් හමු ව ඇත්තේ.
නමුත් වාර්තා වන තොරතුරු අනුව, නිවසෙහි ගෙහිමියන් ව සිටි එකම පවුලේ මව, පියා සහ දැරියන් දෙදෙනාගේ සිරුරු මෙතෙක් හමු වී නැහැ.
මේ දිනවල ඇදහැලෙන ධාරානිපාත වර්ෂාව හේතුවෙනුයි ඊයේ රාත්රියේ දී මෙම නිවස මතට පස් කන්දක් කඩා වැටී ඇත්තේ.
එහිදී නිවසෙහි සිටි 45 හැවිරිදි පියා, 40 හැවිරිදි මව සහ 10 හා 16 වියෙහි පසුවන දැරියන් දෙදෙනා ද පස් කන්දට බිලි වුණා.
මෙම නායයෑමෙන් තවත් නිවාස 03කට ද හානි සිදු වුණා.
ඉන් එක් නිවසක සිර වී සිටි වයෝවෘද්ධ පුද්ගලයෙකු අද පෙරවරුවේ දී මුදා ගෙන රෝහල්ගත කිරීමට ආරක්ෂක අංශවලට හැකියාව ලැබුණා.
අතුරුදන් වූ එකම පවුලේ සිව්දෙනා සොයා සිදු කරමින් තිබූ මෙහෙයුම් මේ වනවිටත් එම ප්රදේශයට ඇදහැලෙන ධාරානිපාත වර්ෂාව හේතුවෙන් නවතා දමා ඇති බවට අප ප්රාදේශීය වාර්තාකරු පැවසුවා.
මේ අතර නොනවතින වර්ෂාව හේතුවෙන් කෑගල්ල, මහනුවර, බදුල්ල, කුරුණෑගල සහ රත්නපුරට නිකුත් කර තිබූ නායයෑමේ අවවාදාත්මක නිවේදනය ඉදිරි පැය 24 සඳහා ද දීර්ඝ කර තිබෙනවා.
