සිය අතුරුදන් වූ ඥාතීන් නොමැතිව හා උතුරේ අහිමි වූ සිය ඉඩම් නොමැති ව කිසිදු නිදහසක් නැති බව පවසමින් උතුරු පළාතේ තැනින් තැන කළු කොඩි ඔසවමින් දැවැන්ත විරෝධතා සංවිධානය වී තිබෙනවා.
අද (04) දිනට යෙදී ඇති 77 වැනි නිදහස් දින සැමරුමට විරුද්ධ ව සහ පවතින පාලනයට එරෙහිවයි මෙලෙස උද්ඝෝෂකයින් විරෝධතා පවත්වන්නේ.
අතුරුදන් වූවන්ගේ ඥාතීන්ගේ සංගමය හා උතුරු පළාතේ සිවිල් සංවිධාන, දේශපාලන සංවිධාන එක් ව කිලිනොච්චිය නගරයේ කළුකොඩි ඔසවා, කළුපටි පැළඳගෙන මෙම විරෝධතාවට එක් ව සිටියා.
යාපනය විශ්වවිද්‍යාලයේ දී ද කළුකොඩි ඔසවා, කළුපටි පැළඳගෙන ශිෂ්‍යයින් තවත් විරෝධතාවක් මීට සහාය පළ කිරීමට පැවැත්වූ බවයි වාර්තා වන්නේ.
යුද්ධය නිමා වී වසර 16 ක් ගත වුව ද මෙතෙක් තමන්ට කිසිදු සාධාරණයක් සිදු ව නොමැති බවයි.
විරෝධතාව වෙනුවෙන් සමස්ත ලංකා දෙමළ කොංග්‍රස් පාර්ලිමේන්තු මන්ත්‍රී ගජේන්ද්‍රකුමාර් පොන්නම්බලම් මහතා, ඉලංගෙයි තමිල් අරසු කච්චි පක්ෂ පාර්ලිමේන්තු මන්ත්‍රී ශිවඥානම් ශ්‍රීධරන් මහතා ඇතුළු දේශපාලන පක්ෂ නියෝජිතයින් පිරිසක් ද එක් ව සිටියා.
