මීට දින 44 කට ඉහතදී අතුරුදහන් වූ කොටදෙණියාවේ දරුවන් දෙදෙනා මීරිගම ප්රදේශයේදී යළි හමු වුවා.ඔවුන් දෙදෙනා ජනවාරි 5දා රාත්රී කාලයේ මීරිගම ආපන ශාලාවක් අසලට පැමිණ කුස ගින්නට කෑම ඉල්ලා ඇති බව සඳහන්.
පසුව එම ආපන ශාලාව හිමි කාන්තාව නැලිගම ප්රදේශයේ පිහිටි තමාගේ නිවසට දරුවන් දෙදෙනා කැඳවාගෙන ගොස් අද දින මීරිගම පොලිසියට භාර දී තිබෙනවා.
ඒ අනුව, මීරිගම පොලිසියට භාර දී සිටි අතුරුදහන් වූ බව කියන මෙම දරුවන්ගෙන් සිද්ධිය සම්බන්ධයෙන් එම දරුවන් දෙදෙනාගෙන් විමසු විට ඔවුන් පවසන්නේ මෙවැන්නක්,
“මායි මල්ලියි හිටියේ බාඳුරාගොඩ අපේ ගෙදර. අපි හැම දා ම අම්මගෙන් ගුටි කනවා. ඒ මල්ලි බලාගන්නේ නෑ කියලා. අපිට හරියට වද දෙනවා. අපි දවසක් දා ගෙදරින් පැනලා ගියා. ඒත් කොටදෙණියාව පොලිසියෙන් අපිව හොයාගෙන ඇවිල්ලා ආයෙත් ඒ ගෙදරට ම භාර දුන්නා. එදා ඉදන් අපි හැමතිස්සේ ම ගුටි කනවා. ඕන දේටයි එපා දේටයි හැම එකට ම අපිට තලනවා. ඉතින් මේ පාර ත් අපි ගෙදරින් පැනලා ගියා. ඒ අම්මලා මීරිගම ටවුන් එකට ආපු වෙලාවේ.
අපි ගිහිල්ලා එහා පැත්තෙ ගෙදරක වත්තක ගොටු කොළ කඩලා මිටි හදන ළඟ කඩයකට විකුණලා රුපියල් සියයක් අරගෙන මීරිගම පයින් ම ආවා. ඊට පස්සේ අපි බස් එහෙක නැගලා මීගමුවට ආවා. මීගමුවේ අපි කඩවල්වල අගු පිලවල්වල රෑට නිදියගත්තා. කඩවල මාමලා දුන්න කෑම අපි කෑවා. පොලිසියේ මාමලා අපෙන් ඇහුවා අපි මොක ද මෙතන කරන්නෙ කියලා. අපි කිව්වා මාමා එනකන් ඉන්නවා කියලා කිව්වා. ඊට පස්සේ අපි පෙරේදා මීරිගම ටවුන් එකට ආවා. එහිදී මීරිගම ටවුන් එකේ කඩේකින් අපි බඩගින්නට කෑම ඉල්ලුවා. ඒ ඇන්ටි හරිම කරුණාවන්තයි. එයා අපිට කෑම දීලා අපිව ගෙදර එක්කගෙන ගියා. අපිට අලුත් ඇඳුම් ඇඳගන්නට දුන්නා. අපි පහුව දා උදේ ම පොලීසියට ගෙනත් භාර දුන්නා. අනේ මාමේ අපිව කොටදෙණියාවේ පොලිසියට ගෙනෙහින් දාන්ඩ එපා. ආයෙත් අපිව අම්මලාට ගිහිල්ලා භාරදෙනවා පොලිසියෙන්. අනේ පින්සිද්ධ වෙයි. පුළුවන් නම් මේ ඇන්ටිලාගේ ගෙදර ම අපිට ඉන්ඩ ඉඩ සලස්වා දෙන්ඩ.”
මේ අතර, මේ සම්බන්ධයෙන් වැඩිදුර කරුණු සෙවීමට පෙර දින දරුවන් නතර වූ බව කියන නැලිගම ප්රදේශයට ගොස් සිදු කළ විමසීමකදී එම ප්රදේශවාසීන් පවසන්නේ මෙම දරුවන් දෙදෙනා මීට දින කිහිපයකට ඉහත දී මෙම නිවසේ සිටිනු දකින්නට ලැබුණු බවයි.
මෙම දරුවන් දෙදෙනා සිටි නිවස කුලී නිවසක් වන අතර එම නිවැසියන්ගෙන් විමසද්දී නිවැසියන් සඳහන් කරන්නේ එම දරුවන් ඔවුන්ගේ ඥාතීන් වන බවයි.
මෙම දරුවන්ගේ දෙමාපියන්ට කොරෝනා වසංගතය වැළඳීම හේතුවෙන් තම නිවසේ රඳවා සිටින බව ද නිවැසියන් සඳහන් කර තිබෙනවා.
