ඉන්දියාවේ උත්තර් ප්‍රදේශ් හි කෞෂාම්බි ගම්මානයේ 12 හැවිරිදි දරුවෙකුට ගුරුවරයෙකු සිදු කළ පහරදීමකින් එම දරුවා අන්ධභාවයට පත් ව ඇති බවට ඉන්දීය මාධ්‍ය වාර්තා කරනවා.
NDTV පුවත් සේවය සඳහන් කරන්නේ 6 ශ්‍රේණියෙහි ඉගෙනුම ලබන මෙම පිරිමි දරුවා හට ගුරුවරයා විසින් පහර දෙනු ලැබ ඇත්තේ පොල්ලකින් බවයි.
ආදිත්‍ය කුෂ්වාහා නම් පහරකෑමට ලක් වූ දරුවා ගුරුවරයාගේ පහරදීමෙන් අනතුරුව රෝහල්ගත කර ශල්‍යකර්ම දෙකකට ද භාජනය කෙරුණ ද ඔහුගේ වම් ඇසෙහි අන්ධභාවය සුව වී නැහැ.
ඔහුගේ මව යුක්තිය පතා දිස්ත්‍රික් ළමා සුබසාධන කමිටුව වෙත පැමිණ ඇති අතර ශෛලේන්ද්‍ර තිවාරි නමැති ගුරුවරයාට එරෙහිව පොලිසිය මේ වන විට නඩුවක් ගොනු කර තිබෙනවා.
මාර්තු 9 වන දින සිදු වූ සිදුවීම විස්තර කරමින් දරුවා කියා සිටියේ පිටත සෙල්ලම් කරන සිසුන් කිහිපදෙනෙකු පන්ති කාමරයට කැඳවන ලෙස ගුරුවරයා තමාගෙන් ඉල්ලා සිටි බවයි.
ඉන් පසුව තමන් සිය සගයින්ට ගුරුවරයා කතා කළ බව දැන්නුව ද ඔවුන් එය තැකීමකට ලක් නොකළ බවත්; ඒ බව තමන් විසින් ගුරුවරයා වෙත දැනුම්දුන් පසු ගුරුවරයා තමන් හට පහර දුන් බවත් මෙම දරුවා පවසා තිබෙනවා.
පහරදීමෙන් පසුව මෙම දරුවාගේ වම් ඇසින් රුධිරය ගලා එන්නට පටන් ගෙන තිබෙනවා.
ඉන් අනතුරුව ගුරුවරයා විසින් විවිධ ප්‍රතිකාර පන්ති කාමරයේ දී ම සිදු කර ඇති අතර; පසුව ලේ ගැල්ම නැවතුණු පසුව දරුවා පන්ති කාමරයට වී නිදාගෙන ඇති බවත් හෙළි ව තිබෙනවා.
පසුව ඔහුගේ සගයින් විසින් පහරකෑමට ලක් වූ දරුවාගේ මවට සිදුවීම පිළිබඳ ව පැවසීමෙන් අනතුරුව එම දරුවා රෝහල්ගත කර ඇති බවයි වාර්තා වන්නේ.
