මිනිස් ශරීයට දැඩි බලපෑමක් ඇති කිරීම හේතුවෙන් මෙරටට ගෙන ඒම තහනම් කළ කෘෂි රසායනික වෙළෙඳසැල්වලට බෙදා හරිමින් සිටි පුද්ගලයන් දෙදෙනෙකු නෙල්ලිඅඩි විශේෂ කාර්ය බලකාය නිලධාරීන්ගේ අත්අඩංගුවට පත් ව තිබෙනවා.
තොරතුරු වාර්තා වන පරිදි මෙම වැටලීම සිදු කර ඇත්තේ; විශේෂ කාර්ය බලකාය නෙල්ලිඅඩි කඳවුරේ නිලධාරීන්ට ගුවන් හමුදා බුද්ධි ඒකකය මගින් ලද තොරතුරකට අනුව ඊයේ (25) කොඩිකාමම් පොලිස් වසමේ කොඩිකාමම් දුම්රිය ස්ථානය ඉදිරිපිට දීයි.
මෙම වැටලීමට උතුරු පළාත් කෘෂිකර්ම දෙපාර්තමේන්තුවේ නිලධාරීන් පිරිසක් ද එක් ව සිටියා.
එහිදී සැකකරු සන්තකයේ තිබී පළිබෝධනාශක රෙජිස්ටාර්වරයාගේ අනුමැතිය නොමැති ව මෙරටට ගෙන්වීම තහනම් කරන ලද IMAGE (THIAMETHOXAM 25% WG) 5g වර්ගයේ කෘමි නාශක පැකට් 2,000 ක් සහ ROCKET (EMAMECTIN BENZOATE 5% SG) 10g වර්ගයේ කෘමි නාශක පැකට් 2,600 ක තොගයක් සොයා ගැනුණා.
එම සැකකරු අදාළ විෂ රසායනික ද්‍රව්‍ය වෙළෙඳසල්වලට බෙදා හැරීම සඳහා ලොරි රථයකින් ප්‍රවාහනය කරමින් සිටි අවස්ථාවේදීයි අත්අඩංගුවට ගැනුණේ.
මොවුන් විස්වමඩු සහ කිලිනොච්චි ප්‍රදේශයේ පදිංචි අවුරුදු 25 සහ 36 වයසේ පසුවන සැකකරුවන් දෙදෙනෙක්.
සිද්ධිය සම්බන්ධයෙන් උතුරු පළාත් කෘෂිකර්ම දෙපාර්තමේන්තුව සහ පොලිසිය වැඩිදුර විමර්ශන සිදු කරනවා.
