තවත් දරුවෙක් ළිඳකට ඇද වැටෙයි

උතුරු තායිලන්තයේ ගැඹුරු ළිඳකට වැටී සිටි කුඩා දැරියක් බේරාගෙන තිබෙනවා.

මියන්මාර දේශසීමාව ආසන්නයේ ටක් පළාතේ ගම්මානයක ඊයේ පස්වරුවේ සෙල්ලම් කරමින් සිටියදී යි මාස 19ක් වයසැති දැරිය මීටර් 13ක් (අඩි 42) ගැඹුරු ළිඳකට ඇද වැටී ඇත්තේ.

අසල කුඹුරක වැඩ කරමින් සිටි දැරියගේ දෙමාපියන් සිදුවීම දැනගැනීමෙන් පසු කළ දැනුවත් කිරීමෙන් අනතුරුව බලධාරීන් දැරිය බේරා ගැනීමේ මෙහෙයුමක් ආරම්භ කළා.

බේරාගත් දැරිය සුළු තුවාල ලබා ඇති අතර ඇය රෝහල් ගත කර ඇති බවයි වාර්තා වන්නේ.

මියන්මාර සංක්‍රමණිකයන් දෙදෙනකුගේ දියණියක යැයි කියනු ලබන කුඩා දැරිය සෙන්ටිමීටර 30ක් (අඟල් 12)ක් පමණ පළල ළිං කුහරයෙන් ඇද වැටී තිබුණා.

බිළිඳාගේ දෙමාපියන් පැවසුවේ ඔවුන් ඇයව ගොවිපලක වැඩ කිරීමට රැගෙන ගොස් වැඩ කරන අතරතුර ඇයව ගසක් යට තබා තිබූ බවයි.

නමුත් විවේක කාලයේදී දරුවා සොයා ගැනීමට නොහැකි වීමත් සමඟ කළ සොයා බැලීමේදී අසල ළිඳකින් හඬා වැටෙන හඬ ඇසී තිබුණා.

අනතුරුවයි දෙමව්පියන් බලධාරීන් දැනුවත් කර ඇත්තේ.

ගලවා ගැනීමේ කණ්ඩායම් කැණීම් යන්ත්‍රයක් භාවිතයෙන් රාත්‍රිය පුරා කැණීම් ආරම්භ කළ අතර, ඔවුන් ළිං පතුළට යාබදව මීටර් 10ක් පමණ ගැඹුරු වළක් හාරා තිබෙනවා.

දරුවාට හුස්ම ගැනීමට හැකි වන පරිදි ළිඳට ඔක්සිජන් ද පොම්ප කළ බවයි සඳහන් වන්නේ.

දිගින් දිගටම කැණීම් යන්ත්‍රය භාවිතා කළහොත් ළිඳ කඩා වැටී දරුවාට හානියක් විය හැකි බවට අවදානමක් මතුවීම හේතුවෙන් සවල භාවිතා කර අවසාන මීටර් කිහිපයේ පස් ඉවත් කිරීම සිදු කර තිබෙනවා.

අවසානයේ දැරිය ළිඳෙන් ගොඩ ගැනීමෙන් පසුව රැස්ව සිටි ගලවා ගැනීමේ සේවකයින්ගෙන් ප්‍රීති ඝෝෂා නගා තිබෙනවා.