ජාතික වනෝද්‍යාන සම්බන්ධයෙන් ජනපති නීති තදකරයි

මෙරට ජාතික වනෝද්‍යාන වෙත ලියාපදිංචි සෆාරි වාහන හැරුණු කොට වෙනත් කිසිඳු වාහනයකට ඇතුළු වීම තහනම් කිරීම ආදී පරිසර ආරක්ෂණ නීති ඇතුළත් නව පනතක් සකස් කරන ලෙස ජනාධිපති රනිල් වික්‍රමසිංහ අදාළ අංශ වෙත උපදෙස් ලබා දී තිබෙනවා.

එතෙක් ජාතික වනෝද්‍යානවලට ලියාපදිංචි සෆාරි වාහන හැරෙන්නට වෙනත් කිසිඳු වාහනයක් ඇතුල් නොකරන ලෙස ජනාධිපතිවරයා නියෝග නිකුත් කර ඇති බව සඳහන්.

ඊට අමතරව ශ්‍රී පාද අඩවි වනාන්තරය, සිංහරාජය ඇතුළු පාරිසරිකව වැදගත් වන ස්ථාන ආරක්ෂා කිරීමේ වෙනමම නීති කඩිනමින් ඊට ඇතුළත් කරන ලෙස ද ජනාධිපතිවරයා උපදෙස් දී තිබෙනවා.

පරිසර අමාත්‍යංශයේ ඉහළ නිලධාරීන් සමඟ ජනාධිපති ලේකම් කාර්යාලයේ දී පවත්වනු ලැබූ විශේෂ සාකච්ඡාවකදී ජනාධිපති වරයා මෙම උපදෙස් ලබාදී ඇති බවයි වාර්තා වන්නේ.