ජංගම දුරකථනයට විදුලිය ආරෝපණය කර, එය නරඹමින් සිටි කුඩා දැරියක් විදුලි සැර වැදී ඊයේ (13) ජීවිතක්ෂයට පත්ව තිබෙනවා.
මෙලෙස අවාසනාවන්ත ලෙස ජීවිතක්ෂයට පත්ව ඇත්තේ මග්ගොන, මුංහේන ප්‍රදේශයේ පදිංචිව සිටි වයස අවුරුදු තුනහමාරක පෙර පාසල් දැරියක්.
මෙම දැරිය ඊයේ දහවල් පෙර පාසල් ගොස් නැවත නිවසට පැමිණ ඇය විසින්ම ජංගම දුරකථනයට විදුලියට ආරෝපණය කර බිම දිගාවී ජංගම දුරකථනය නරඹමින් සිට තිබෙනවා.
පසුව ඇය කිසිඳු කතාබහක් නොමැතිව බිම වැතිරී සිටීම හේතුවෙන් සහෝදරයා ඒ පිළිබඳව මවට දැන්වීමට කටයුතු කර ඇති බව සඳහන්.
අනතුරුව සිහිසුන්ව බිම වැතිරී සිටි දැරිය එම මොහොතේ ම බේරුවල ප්‍රාදේශීය රෝහලට රැගෙන ගොස් ඇති අතර, එහිදී ඇය අවාසනාවන්ත ලෙස ජීවිතක්ෂයට පත්ව ඇති බවයි වාර්තා වුණේ.
දේහය පශ්චාත් මරණ පරීක්ෂණය සඳහා කළුතර ශික්‍ෂණ රෝහලට රැගෙන ගොස් ඇති අතර, සිද්ධිය සම්බන්ධයෙන් පයාගල පොලිසිය වැඩිදුර විමර්ශන සිදුකරනු ලබනවා.
