ජපානය, ඉන්දියාව වැනි රටවල් සමග පවතින මිත්‍රශීලීත්වයට හානී කර ගැනීම තුළින් අපට ඉදිරි ගමනක් නොමැති බව ග්‍රාමීය මාර්ග හා අවශේෂ යටිතල පහසුකම් රාජ්‍ය අමාත්‍ය නිමල් ලන්සා මහතා පවසයි.
මාධ්‍ය වෙත නිවේදනයක් නිකුත් කරමින් රාජ්‍ය අමාත්‍යවරයා මේ බව පැවසීය.
රටක් ලෙස ආර්ථික වශයෙන් ශක්තිමත්ව ඉදිරියට ගමන් කිරීමට නම් රාජතාන්ත්‍රික සබඳතා ශක්තිමත් කර ගනිමින් ඔවුන් සමග ආයෝජන අවස්ථා ඇති කර ගත යුතු බවත් එසේ නොමැති වුවහොත් රට විශාල ආර්ථික අර්බුදයකට පත්වනු ඇති බවත් නිමල් ලන්සා මහතා නිවේදනය කළේය.
විවිධ පාර්ශව එක්ව රටට ලැබෙන ආයෝජන අවස්ථාවන් අහිමි කිරීම, මිලියන 22 ක් වූ ශ්‍රී ලංකික ජනතාවට සිදු කරනු ලබන බරපතල හානියක් බවත් ඒ සදහා එම වගකිව යුතු බවත් රාජ්‍ය අමාත්‍ය නිමල් ලන්සා මහතා අවධාරණය කරයි.
ඇතැම් පාර්ශව ගමේ චන්ඩින් මෙන් හැසිරෙමින් හා පුරසාරම් දෙඩීමෙන් රාජතාන්ත්‍රික සබඳතාවලට සිදු කරන හානිය ඉතා බරපතළ බව ද නිමල් ලන්සා මහතා පෙන්වා දී තිබේ.
