පළාත් පාලන ඡන්ද විමසීමට අදාළව ඉදිරිපත් කෙරුණු නාමයෝජනා පත්‍ර ප්‍රතික්ෂේප කිරීම අභියෝගයට ලක් කරමින් මේ වන විට අභියාචනාධිකරණය හමුවේ පෙත්සම් ගොනු කර තිබෙන කොළඹ මහ නගර සභාව ඇතුළු පළාත් පාලන ආයතනවලට අදාළව ඡන්ද විමසීම කටයුතු ඉදිරියට කරගෙන යාම අද (02) දින තෙක් වළකින ලෙස අදාළ තේරීම් භාර නිලධාරීන්ට දැනුම් දෙන්නැයි අභියාචනාධිකරණය ඊයේ (01) නියෝග කළා.
කොළඹ මහ නගර සභාව ඇතුළු පළාත් පාලන ආයතන ගණනාවකට ඉදිරිපත් කෙරුණු නාම යෝජනා පත්‍රය ප්‍රතික්ෂේප කිරීමට එරෙහිව එක්සත් ජනතා නිදහස් සන්ධානය, සර්ව ජන බලය, ස්වාධීන කණ්ඩායම් ඇතුළු පාර්ශ්ව විසින් මේ වන විට අභියාචනාධිකරණය හමුවේ පෙත්සම් 30 කට ආසන්න සංඛ්‍යාවක් ගොනු කරනු ලැබූ බවයි අධිකරණ වාර්තාකාරිණිය සඳහන් කළේ.
ඒ පෙත්සම් සලකා බැලීමෙන් අනතුරුව අභියාචනාධිකරණයේ වැඩ බලන සභාපති මොහොමඩ් ලෆාර් තාහීර් සහ කේ.පී. ප්‍රනාන්දු යන අභියාචනාධිකරණ විනිසුරු මඩුල්ල විසින් මෙම නියෝගය නිකුත් කරනු ලැබුවා.
කොළඹ මහ නගර සභාව වෙනුවෙන් එක්සත් ජනතා නිදහස් සන්ධානය විසින් ඉදිරිපත් කළ නාමයෝජනා ප්‍රතික්ෂේප කිරීමට එරෙහිව එම පක්ෂය වෙනුවෙන් පෙනී සිටි ජනාධිපති නීතිඥ ෆයිසර් මුස්තාෆා අධිකරණය හමුවේ කරුණු දක්වමින් සිය සේවා දායකයින්ගේ නාමයෝජනා පත්‍රය ප්‍රතික්ෂේප කිරීමට තේරීම් භාර නිලධාරියක් ගත් තීරණය සම්පූර්ණයෙන්ම නීතියට පටහැනි බව පෙන්වා දුන්නා.
සෙසු පෙත්සම්කරුවන් වෙනුවෙන් පෙනී සිටි නීතිඥවරුද සිය සේවා දායකයින්ගේ නාමයෝජනා පත්‍ර ප්‍රතික්ෂේප කිරීමට අදාළ තේරීම් භාර නිලධාරීන් ගැන ලැබූ තීරණය නීතියට පටහැනි බවත් තර්ක කළා.
සෙසු පෙත්සම්කරුවන් වෙනුවෙන් පෙනී සිටි ජනාධිපති නීතිඥ අලි සබ්‍රි ඇතුළු නීතිඥවරු පිරිසක් කරුණු ඉදිරිපත් කරමින් සඳහන් කළේ සිය සේවාදායකයින්ගේ නාම යෝජනා ප්‍රතික්ෂේප කිරීමට තේරීම් භාර නිලධාරීන් ගත් තීරණය නීතියට පටහැනි බවයි.
මෙම පෙත්සම් විභාග කිරීමට අධිකරණයට බලයක් නොමැති බව සඳහන් කරමින් ඇතැම් පෙත්සම් සම්බන්ධයෙන් වග උත්තරකරුවන් විසින් මූලික විරෝධතා ද මතු කරනු ලැබුවා.
ඉදිරිපත් වූ කරුණු සලකා බැලූ අභියාචනාධිකරණ විනිසුරු මඬුල්ල මෙම පෙත්සම් වැඩිදුර කරුණු තහවුරු කිරීම සඳහා අද (02) දින කැඳවන ලෙස නියම කළා.
ඒ අනුව මෙම නඩුවලට පාදක වන පළාත් පාලන ආයතනවලට අදාළව ඡන්ද විමසීම පැවැත්වීම සම්බන්ධයෙන් අද දින තෙක් ඉදිරි ක්‍රියාමාර්ග ගැනීමෙන් වළකින ලෙස තේරීම් භාර නිලධාරීන්ට දැනුම්දෙන ලෙසත් අභියාචනාධිකරණ විනිසුරු මඬුල්ල වැඩිදුරටත් නියම කෙරුණා.
පෙත්සම්කරුවන් සිය පෙත්සම්වලින් කියා සිටින්නේ පළාත් පාලන ඡන්ද විමසීම සඳහා ඉදිරිපත් කළ නාමයෝජනා පත්‍ර ප්‍රතික්ෂේප කිරීමට තේරීම් භාර නිලධාරීන් ගත් තීරණය සම්පූර්ණයෙන්ම නීතියට පටහැනි බවයි.
එබැවින් එම තේරීම් භාර නිලධාරීන්ගේ තීරණය අවලංගු කොට අදාළ නාම යෝජනා පත්‍ර යළි භාරගන්නා ලෙස නියෝගයක් නිකුත් කරන ලෙසත් එම පෙත්සම්වලින් වැඩිදුරටත් ඉල්ලා සිටිනවා.
