කරාපිටිය පිළිකා රෝහලේ ළමා වාට්ටුව වසා දමා මාස හතරකට අධික කාලයක් ගතව ඇති බවත් මේ නිසා තම දරුවන් මහරගම අපේක්ෂා රෝහලට ගෙන යාමට සිදුවීමෙන් තමන් මහත් අපහසුවට පත්ව ඇති බවත් දකුණු පළාතේ පිළිකා රෝගී ළමයින්ගේ දෙමවුපියෝ පවසති.
කරාපිටිය පිළිකා රෝහලේ මෙම ළමා පිළිකා වාට්ටුව ආරම්භ කර ඇත්තේ 2007වසරේය. එතැන් සිට පසුගිය වසරේ සැප්තැම්බර් මාසය දක්වා දකුණු පළාතේ පිළිකා රෝගී ළමයින් 300කට අධික සංඛ්‍යාවක් ප්‍රතිකාර ලබමින් සිට ඇත.එහෙත් මේ වනවිට එම වාට්ටුවේ කිසිම රෝගී දරුවෙකු නොමැති අතර වාට්ටුවේ සේවයක කළ හෙදියන් නව දෙනොද වෙනත් වාට්ටුවලට මාරුකර ඇත.
පිළිකා වාට්ටුවේ සිටින සියලුම රෝගීන්ට දවස් තුන්සිය හැට පහේම තම සංගමය ආහාර පාන ලබා දෙන බව පිළිකා සංගමයේ ජ්‍යෙෂ්ඨ උප සභාපති ජයරත්න මල්වැන්න පැවසුවේය. එයට අමතරව මහරගම අපේක්ෂා රෝහලට යාම සඳහා දීමනාද ඇතුළු අනෙකුත් පහසුකම් ලබා දෙන බවත් ඔහු පැවසීය.
කෙසේ වෙතත් පිළිකා රෝහලේ ළමා වාට්ටුව වසා දැමීම බලවත් අපරාධයක් බවද එනිසා හැකි ඉක්මනින් සුදුසුකම් ලත් වෛද්‍යවරයෙකු පත්කර නැවත ළමා වාට්ටුව ආරම්භ කිරීමට පියවර ගතයුතු බවද ජයරත්න මල්වැන්න වැඩි දුරටත් පැවසීය.
මේ පිළිබඳව කරාපිටිය රෝහලේ නියෝජ්‍ය අධ්‍යක්ෂ හර්ෂණී උබේසේකර ගෙන් විමසූවිට කියා සිටියේ කරාපිටිය රෝහලේ සිටි ළමා පිළිකා රෝග විශේෂඥ වෙද්‍යවරයා මහරගම අපේක්ෂා රෝහලට ස්ථාන මාරුවක් ලබායාම නිසා වාට්ටුව වසා දමීමට සිදුව ඇති බවය. ළමා පිළිකා රෝග පිළිබඳ විශේෂඥ වෛද්‍යවරුන් ලංකාවේ සිටින්නේ කිහිප දෙනෙකු නිසා මේ තත්ත්වය ඇතිවී තිබෙන බවත් නියෝජ්‍ය අධ්‍යක්ෂවරිය වැඩි දුරටත් පැවසුවාය
