අහුන්ගල්ල පතිරාජගම ප්‍රදේශයේදී දෙපිරිසක් අතර ඇතිවූ ආරවුලකදී එල්ලවූ ඇසිඩ් ප්‍රහාරයකින් සහ තියුණු ආයුධයකින් කළ පහරදීමකින් පුද්ගලයන් 8 දෙනෙකු තුවාල ලබා තිබෙනවා.
මෙම ගැටුමෙන් කණ්ඩායම් දෙකෙහිම පිරිස්වලට තුවාල සිදුවී ඇති අතර කාන්තාවන් 4 දෙනෙකු ද තුවාල ලබා ඇති බවයි අප වාර්තාකරු සඳහන් කළේ.
එක් පාර්ශවයකින් එල්ල කරන ලද කඩු පහාරයකින් අනෙක් පාර්ශවයේ අයකුට බරපතල තුවාල සිදුවී ඇති අතර අනෙක් පාර්ශවය ඊට පිළිතුරු වශයෙන් එල්ල කරන ලද ඇසිඩ් පහාරයකින් හා පහරදීම්වලින් පිරිසකට තුවාල සිදුවී ඇති බව හෙළිවී තිබෙනවා.
පෞද්ගලික ආරවුලක් මත මෙම ගැටුම හටගෙන ඇත්තේ අසල්වැසි නිවෙස් දෙකක් අතර බව සඳහන්.
තුවාලකරුවන් අතර එක් පවුලක මව, දුව සහ පුත්‍රයා මෙන්ම අනෙක් පවුලේ පියා, මව සහ පුත්‍රයන් දෙදෙනෙකු ද වනවා.
තුවාලකරුවන් ඇතුලත් කර ඇත්තේ බලපිටිය රෝහලටයි. සිද්ධිය සම්බන්ධයෙන් පොලිස් පරීක්ෂණ ආරම්භ කර තිබෙනවා.
