නිකොටින් සහිත වාෂ්ප හෙවත් ඉලෙක්ට්‍රොනික සිගරට් ඖෂධ සැල් මගින් විකිණීමේ දී නව සීමා පැනවීමට ඔස්ට්‍රේලියාව පියවර ගෙන තිබෙනවා.
දැඩි වාෂ්ප විරෝධී නීති කිහිපයක් හඳුන්වා දෙමින් ඉලෙක්ට්‍රොනික සිගරට් මිල දී ගැනීම තවදුරටත් දුෂ්කර කිරීමටයි ඔස්ට්‍රේලියාව මේ මගින් පියවර ගෙන ඇත්තේ.
ඒ අනුව ඉලෙක්ට්‍රොනික සිගරට් මිල දී ගැනීමේ දී ඖෂධවේදියෙකු වෙත බලයලත් වෛද්‍යවරයෙකුගේ බෙහෙත් වට්ටෝරුව ඉදිරිපත් කිරීම අනිවාර්‍යය වනවා.
මින් ඉදිරියට ඉලෙක්ට්‍රොනික සිගරට් භාවිත කරන්නන්ට රස තේරීම් තුනක් පමණක් ඇති අතර එය මින්ට්, මෙන්තෝල් සහ දුම්කොළ රසට සීමා වනවා.
මේ වන විටත් රටවල් විශාල සංඛ්‍යාවක් ඉවත දැමිය හැකි ඉලෙක්ට්‍රොනික සිගරට් තහනම් කර ඇති නමුත් වෙළඳසැල්, සේවා ස්ථාන සහ අනෙකුත් කුඩා සිල්ලර වෙළෙන්දන් හරහා ඉලෙක්ට්‍රොනික සිගරට් විකිණීම තහනම් කිරීමට පියවර ගෙන ඇත්තේ ඔස්ට්‍රේලියානු රජය පමණක් බව සඳහන්.
වර්ණවත් වෙළඳනාම සහ විවිධ රසයන් සමගින් එන ඉලෙක්ට්‍රොනික සිගරට්හි අවසානය ළමයින්
නිකොටින්වලට ඇබ්බැහි කරවීම බවත්, එම උපක්‍රමය අවහිර කිරීමට තම රජයට හැකියාව ලැබෙන බවත් ඔස්ට්‍රේලියානු බලධාරීන් පවසනවා.
