රටේ අනාගතය සහ ජනතාවගේ අනාගතය තීරණය කරන මෙවර ජනාධිපතිවරණයේ දී සෑම ජනාධිපති අපේක්ෂකයෙකුම රට ඉදිරියට ගෙන යන තම සැබෑම ආර්ථික ප්‍රතිපත්තිය රටට ප්‍රකාශ කළ යුතු බව ජනාධිපති රනිල් වික්‍රමසිංහ පවසනවා.
ජනතාවද තම අනාගතය සටන් පාඨ නායකයන්ට භාර නොදිය යුතු බව අවධාරණ කළ ජනාධිපතිවරයා බුදුන් වහන්සේ වදාළ පරිදි තම අනාගතයට බලපාන කරුණු තර්ක කරමින් බුද්ධියෙන් විමසා බැලීමට ජනතාව පෙරට පැමිණිය යුතු බවද කියා සිටියා.
ජනාධිපතිවරයා මේ බව සඳහන් කර සිටියේ අනුරාධපුර දිස්ත්‍රික් වෘත්තීයවේදීන් සහ ව්‍යාපාරිකයන් සමඟ අද (11) අනුරාධපුරයේ පැවති හමුවකට එක් වෙමින්.
2022 වර්ෂය තුළ මෙරට ආර්ථිකයේ පැවති අර්බුදකාරී තත්ත්වය පිළිබඳව තව දුරටත් අදහස් දැක් වූ ජනාධිපතිවරයා සාඳහන් කළේ, මෙරට ආර්ථිකය අස්ථාවර වුවහොත් රටත් අස්ථාවර වන බවයි.
වැඩිදුරටත් අදහස් දැක් වූ ජනාධිපතිවරයා කියා සිටින්නේ, තමා විසින් වසර දෙකක් තුළ රටේ ආර්ථිකයට ස්ථාවරත්වයක් ඇති කළ බවත් තවදුරටත් සම්පූර්ණයෙන්ම මෙරට ආර්ථිකය ශක්තිමත් වී නොමැති බවත්ය.
