යහපාලන ආණ්ඩුව සමයේ නිවාස අමාත්‍යාංශයේ මුදල් වංචාවක් සිදු වූ බවට සජිත් ප්‍රේමදාස මහතාට චෝදනා එල්ල කරන බවත් වැරැද්දක් තිබේ නම් අධිකරණයට යා යුතු බවත් සමගි ජන බලවේගයේ පාර්ලිමේන්තු මන්ත්‍රී මනූෂ නානායක්කාර මහතා පැවසීය.
පාර්ලිමේන්තුව වර්ජනය කළ සමගි ජන බලවේගයේ මන්ත්‍රීවරුන් විකල්ප පාර්ලිමේන්තුව යන තේමාව යටතේ අද (06දා) ඇතුල්කෝට්ටේ සමගි ජන බලවේග ප්‍රධාන කාර්යාලයේ පැවති මාධ්‍ය හමුවකට එක්වෙමින් හෙතෙම මේ බව සඳහන් කළේය.
“මේ රටේ පාර්ලිමේන්තුව තිබෙන්නේ ජනතාව වෙනුවෙන් පත් කළ මන්ත්‍රීවරුන්ට ජනතාවගේ අදහස් පාර්ලිමේන්තුව හමුවේ ඉදිරිපත් කරලා සාකච්ඡා කරලා, ඒ සඳහා වූ නීති සම්පාදනය කරලා රටේ ජනතාවට සහන සැලසීම වෙනුවෙන් කටයුතු කරන්න.
නමුත් අවාසනාවකට මේ පාර්ලිමේන්තුවේ පසුගිය දින කිහිපය තුල අපිට දකින්න ලැබුණු තත්ත්වය තමයි ආණ්ඩුවේ වැරදි අඩුපාඩු පෙන්වා දෙනකොට ඒක දරාගන්න බැරි තත්ත්වයක් ආණ්ඩුවට ඇති වෙලා තිබෙනවා. ආණ්ඩුව වංචා සිදු කරනකොට , ගසාකෑම්, දූෂණ සිදු කරනකොට ඒවා ගැන හෙලිදරව් කිරීම ආණ්ඩුවේ දැඩි මර්දනයක් වෙන්න හේතු වෙලා තිබෙනවා.
අද නිවාස අමාත්‍යාංශයේ වැය ශීර්ෂය ගැන කතා කරද්දි රණසිංහ ප්‍රේමදාස මහත්මයා හැරුණු විට මේ රටේ මෙහෙම නිවාස සංකල්පයක් ගොඩ නැගෙන්නේ නෑ. එතනින් පසු සජිත් ප්‍රේමදාස මහතා බලයට ආවට පස්සේ තමයි නැවත වතාවක් නිවාස අමාත්‍යාංශයේ බැබලීමක් ඇති වෙන් පටන් ගත්තේ.
එහෙම නැතිව මහල් නිවාස වල තින්ත ටිකක් ගාන එක විතරයි කට්ටිය කළේ. සජිත් ප්‍රේමදාස මහත්මයාට චෝදනා කරනවා නිවාස අමාත්‍යාංශයේ මුදල් වංචා තිබෙනවා කියලා. අපි නම් චෝදනා කර කර හිටියේ නෑ. අපි අධිකරණයට ගියා. අපි කියන්නේ වැරැද්දක් තිබෙනවා නම් යන්න අධිකරණයට. දැන් බොරුවට පාර්ලිමේන්තුව ඇතුලේ ඇවිත් කියන්නේ නැතිව.
මේ චෝදනා කරන්නේ ප්‍රචාරක වියදම් කළා කියලා. ගම්මාන දහස් ගානක් හදනකොට ඒක රට දැනුවත් කරන්න පෝස්ටරයක් ගහපු එක වැරදියිද? ඒත් මේ ප්‍රචාරන වියදම් ගැන කතා කරනකොට යහපාලනයට කලින් තිබුණු ආණ්ඩුවේ ප්‍රචාරන වියදම් ගැන අපි අමුතුවෙන් කතා කරන්න ඔ්නී නෑ. හංදියක් හංදියක් ගානේ පෝස්ටර්, කටවුට් තිබුණු විදිය මතකයි. ව්‍යාපෘතිය පොඩි වුනාට උත්සවයට කෝටි ගණන් වියදම් කරපු අවස්ථා තිබුණා. මේ වංචා දූෂණ ගැන කතා කරන්න පුලුවන් කණ්ඩායමක්ද මේ ඉන්නේ.”
