අයර්ලන්ත කණ්ඩායමට එරෙහිව පැවති විස්සයි විස්ස තරග අපරාජිත වාර්තා රැකගෙන මෙවර විස්සයි විස්ස ලෝක කුසලානයට සුබවාදී ආරම්භයක් ලබා ගැනීමට ශ්රී ලංකා කණ්ඩායමට ඊයේ (08) රාත්රියේ හැකියාව ලැබුණා.
ඒ, මෙවර පන්දුවාර විස්සයි විස්ස ලෝක කුසලානයේ දී ශ්රී ලංකාව සහභාගී වූ පළමු තරගය ලකුණු 20කින් ජයගනිමින්.
නිමා වූ එංගලන්ත තරගාවලියේ දී පසුබෑමකට ලක්ව සිටි ශ්රී ලංකා විස්සයි විස්ස කණ්ඩායමේ යම් පිබිදීමක් ඊයේ පැවති ලෝක කුසලාන තරගයේ දී දැකගත හැකි වුණා
.
මෙම තරගයේ දී පළමුව පන්දුවට පහර දුන් ශ්රී ලංකාව නියමිත පන්දුවාර විස්ස තුළ කඩුලු 06ක් දැවී ලකුණු 163ක් රැස් කළා.
අනතුරුව ලකුණු 164ක ඉලක්කයක් හඹා ගිය අයර්ලන්තයට පන්දුවාර 19යි පන්දු 05ක් අවසානයේ කඩුලු සියල්ල දැවී රැස්කරගත හැකි වුණේ ලකුණු 143ක් පමණයි.
ඒ, අනුව ලකුණු 20කින් තරගය ජයගත් ශ්රී ලංකාව, අයර්ලන්තයට එරෙහි විස්සයි විස්ස තරග අපරාජිත වාර්තාව රැකගන්නට ද ඊයේ (08) සමත් වුණා.
ශ්රී ලංකාව සහ අයර්ලන්තයට ජාත්යන්තර විස්සයි විස්ස පිටියේ මේ දක්වා අවස්ථා හතරක දී මුණගැසී ඇති අතර, එම තරග හතරම ජයගැනීමට ශ්රී ලංකාවට හැකිව තිබෙනවා.
මේ අතර 2026 පන්දුවාර විස්සයි විස්ස ලෝක කුසලාන තරගාවලියේ තවත් තරග 03ක් අද (09) පැවැත් වෙනවා.
ඉතාලි සහ ස්කොට්ලන්ත කණ්ඩායම් අතර තරගය අද ඉන්දියාවේ කොල්කටාහි දී පැවැත්වෙන අතර එම තරගය මෙරට වේලාවෙන් පෙරවරු 11.00ට ආරම්භවීමට නියමිතයි.
ඕමාන සහ සිම්බාබ්වේ කණ්ඩායම් අතර තරගය අද (09) පස්වරු 3.00ට කොළඹ SSC ක්රීඩාංගණයේදී ආරම්භ වනවා.
කැනඩාව සහ දකුණු අප්රිකා කණ්ඩායම් අතර තරගය ඉන්දියාවේ අහමදාබාද්හි දී පැවැත්වෙන අතර, එම තරගය ආරම්භ වන්නේ මෙරට වේලාවෙන් අද රාත්රී 07.00ටයි.
