බණ්ඩාරවෙල නගරයේ ප්‍රසිද්ධ පාසලක ඉගෙනුම ලබන 10 හැවිරිදි පාසල් සිසුවියක්, කිසියම් පිරිසක් විසින් පැහැරගෙන යෑමට දැරූ උත්සාහයක් ව්‍යර්ථ වී තිබෙනවා.
සිසුවිය පසුගිය සිකුරාදා (19) පාසැල නිම වී තනිව පාසල් බස් රථයට යමින් සිටිය දී වෑන් රථයකින් පැමිණි පිරිසක් ඇයව පැහැරගෙන යාමටයි උත්සාහ දරා ඇත්තේ.
මෙම සිද්ධිය සම්බන්ධයෙන් අප බණ්ඩාරවෙල පොලිසියෙන් සිදුකළ විමසීමක දී සඳහන් කළේ එවැනි සිදුවීමක් සම්බන්ධයෙන් පැමිණිල්ලක් ලැබී ඇති බවයි.
එම පැමිණිල්ලට අනුව මේ වනවිටත් විමර්ශන ආරම්භකර ඇති බව බණ්ඩාරවෙල පොලිසියේ උසස් පොලිස් නිලධාරියෙක් අප සමඟ ප්‍රකාශ කර සිටියා.
පසුගිය සිකුරාදා (19) දින සිසුවිය පාසල නිමව තනිව පාසල් බස් රථයට යෑමට බණ්ඩාරවෙල, සීවලි මාර්ගය ඔස්සේ පාගමනින් යමින් සිටියදී, පාසලේ සිට මීටර් 500ක පමණ දුර ඇති ග්‍රේන්ජ් ස්ටෙප් පඩිපෙළ ආසන්නයේ දී සුදු පැහැති වෑන් රථයක් මාර්ගය අසල නවතා ඇති ආකරය දැක තිබෙනවා.
එම අවස්ථාවේ තරුණයකු වෑන් රථයෙන් බැස සිසුවිය අසලට පැමිණ “අම්මා අසනීප වී රෝහලේ නතර කළා. ඔයාට මේ චොක්ලට් එක දීලා ඔයාව වෑන් එකේ එක්ක එන්න කිව්වා.” යනුවෙන් පවසා ඇති බවයි වාර්තා වන්නේ.
කෙසේ වෙතත් එම අවස්ථාවේ දී සිය මව, සහෝදරයා ඉගෙනුම ලබන පාසලට යන බව පෙරදින තමන්ට පැවසූ බවට සිසුවියට සිහිපත් වී ඇති බවත් ඒ, සමඟ බියට පත්වූ ඇය පඩිපෙළ ඔස්සේ දිවවිත් බණ්ඩාරවෙල නගරයේ පිහිටි වෙළඳසැලකට ගොස් බේරී ඇති බව සඳහන්.
අනතුරුව සිද්ධිය සම්බන්ධයෙන් සිසුවිය මව සමඟ පැමිණ පොලිසියට පැමිණිලි කර තිබෙනවා.
