පසුගිය මාස 06ක කාලය තුළ වගාවන්ට වන සතුන්ගෙන් රුපියල් බිලියන 50කට අධික හානියක් සිදුව ඇති බව කෘෂිකර්ම අමාත්‍ය මහින්ද අමරවීර සඳහන් කරනවා.
අනුරාධපුරය – රනෝරාව ගොවිජන සේවා මධ්‍යස්ථානයේ පැවති ගොවීන් සදහා බහු කාර්ය උපකරණ බෙදාදීමේ වැඩ සටහනකට සහභාගි වෙමින් අමාත්‍යවරයා මේ බව සඳහන් කළා.
එහිදී වැඩිදුරටත් අදහස් දැක්වූ අමාත්‍යවරයා,
“වන සතුන්ගෙන් වගාවන්ට සිදුවන හානිය දිනෙන් දින වැඩි වන්නට පටන් ගෙන තිබෙනවා. පසුගිය මාස 06ක කාලය තුළ පමණක් වඳුරන්, රිළවුන් සහ දඬුලේණුන් විසින් පොල්ගෙඩි මිලියන 93ක් පමණ විනාශ කරලා. ඊට අමතරව මොණරා,වල් ඌරා, ඉත්තෑවා වැනි සතුන් වගාවන්ට සිදු කරන විනාශය අති විශාලයි. ඉදිරි අවුරුදු 02ක කාලය තුළ මේ විනාශය අවම කර ගැනීමට අපි කටයුතු කළ යුතුව තිබෙනවා.”
මේ අතර බිත්තර මිල ඉහළ යෑම සම්බන්ධයෙන් ද අමාත්‍යවරයා මෙහිදී අදහස් දක්වා සිටියා.
එහිදී ඔහු සඳහන් කළේ බිත්තර මිළ ඉහළ යාමට ප්‍රධානතම හේතුව වී ඇත්තේ සත්ව ආහාර සම්පාදනය කර ගැනීමට නොහැකි වීම බවයි.
සතුන්ට අවශ්‍ය ආහාර සම්පාදනය කර ගැනීමට නොහැකි වීම බිත්තර වලට පමණක් නොව කිරි ගව පාලනයට ද බලපෑම් එල්ලකර තිබෙන බවයි ඔහු වැඩිදුරටත් සඳහන් කර සිටියේ.
