ස්වභාවික ආපදා මගින් පමණක් නොව දුර්වල අධිකරණ පද්ධතියක් හේතුවෙන් ද රටක් ඉතා කෙටි කාලයකින් විනාශ විය හැකි බව අගවිනිසුරු ප්රීති පද්මන් සූරසේන මහතා පවසනවා.
එවැනි තත්ත්වයක් ඇති වුවහොත් කිසිදු ජාත්යන්තර ආධාරයක් හෝ ජාත්යන්තර සහායක් මගින් රට යථා තත්ත්වයට පත් කළ නොහැකි බවයි අගවිනිසුරුවරයා පවසන්නේ.
ශ්රී ලංකා විනිශ්චයකාරවරුන්ගේ ආයතනයේ නව මහේස්ත්රාත්වරුන් සඳහා ඊයේ (02) පැවැති උත්සවයක දී අදහස් දක්වමින් අගවිනිසුරුවරයා මෙම අදහස් පළ කළා.
මෙහිදී වැඩිදුරටත් අදහස් දක්වමින් අගවිනිසුරුවරයා පැවසුවේ විනිසුරුවරුන් සඳහා බලය ලබාදෙන්නේ ජනතාව බවත් එම බලය ජනතාවගේම යහපත උදෙසා භාවිතා කළ යුතු බවත් අවධාරණය කර සිටියා.
“විනිසුරුවරුන් වශයෙන් ඔබ මේ අසුනේ ඉඳගෙන ක්රියාත්මක කරන්නේ ජනතාවගේ අධිකරණ බලයයි. ඔබ ඒ බලය ඔබේ නිවසින් රැගෙන එන්නේ නැහැ. අප ඔබට ඒ බලය ලබා දෙන්නෙත් නැහැ. අධිකරණ සේවා කොමිෂන් සභාව ඔබට බලය ලබා දෙන්නේ නැහැ. එසේ නම් ඔබට බලය ලබා දෙන්නේ කවුද? ජනතාව. ඒ කාගේ යහපත උදෙසාද ? ජනතාවගේම යහපත උදෙසායි. ඒ කරුණ අප නිරන්තරයෙන් මතක තබා ගත යුතුයි.”
