බඩ ඉරිඟු ආනයනය කිරීමේ දී පනවා තිබූ විශේෂ වෙළඳ බද්ද කිලෝවකට රුපියල් 75.00 සිට රුපියල් 25.00 දක්වා අඩු කරනු ලැබූයේ ත්‍රිපෝෂ නිෂ්පාදන සමාගම සඳහා ආනයනය කරන බඩ ඉරිඟු සඳහා පමණක් වන බව මුදල් රාජ්‍ය අමාත්‍ය රංජිත් සියඹලාපිටිය පවසනවා.
අවිස්සාවේල්ල, තල්දූව ප්‍රදේශයේ අද (20) උදෑසන පැවති වැඩසටහනතකින් අනතුරුව මාධ්‍ය වෙත අදහස් දක්වමින් අමාත්‍යවරයා මේ බව සඳහන් කළා.
පසුගිය 18 වනදා සිට බලපැවැත්වෙන පරිදි මෙම බද්ද අඩු කළ ද අනිකුත් බඩ ඉරිඟු ආනයන කටයුතු සඳහා මෙම බදු අඩු කිරීම බල නොපැවැත්වෙන බවයි ඔහු වැඩිදුරටත් සඳහන් කළේ.
එලෙස ත්‍රිපෝෂ නිෂ්පාදනයට ප්‍රමාණවත් පරිදි බඩ ඉරිඟු ගෙන්වීමෙන් අනතුරුව ඕනෑම අවස්ථාවක මෙම බද්ද යළි පැනවිය හැකි බව ද අමාත්‍යවරයා සඳහන් කළා.
දේශීය ආදායම් දෙපාර්තමේන්තුවට රුපියල් කෝටි 200ක පමණ අගරු චෙක්පත් ලබාදීමේ සිද්ධිය සම්බන්ධයෙන්ද අමාත්‍යවරයා මෙහිදී කරුණු සඳහන් කළා.
