චීනයෙන් ආනයනය කරනු ලබන මෝටර් රථ, සැහැල්ලු ට්රක් රථ සහ බස් රථ සඳහා වන ටයර් වෙනුවෙන් ඉහළ Anti-Dumping Duties පැනවීමට යුරෝපීය කොමිසම පියවර ගෙන ඇති බව රොයිටර් පුවත් සේවය වාර්තා කරනවා.
පසුගිය වසරේ නොවැම්බර් මාසයේදී ආරම්භ කරන ලද විශේෂ විමර්ශනයකින් අනතුරුව පනවන ලද මෙම නව බදු ප්රතිශතයන්, අදාළ නිෂ්පාදකයා අනුව 4.3% සිට 45.3% දක්වා ඉහළ අගයන්ගෙන් යුක්ත වනවා.
යුරෝපීය කොමිසම නිල ප්රකාශයක් නිකුත් කරමින් පෙන්වා දෙන්නේ, චීනයේ සිට යුරෝපා සංගමයට අයත් රටවල් වෙත මෙලෙස මෝටර් රථ සහ සැහැල්ලු ලොරි රථ ටයර් අසාධාරණ ලෙස ඉතා අඩු මිල ගණන් යටතේ ඇතුළු වී ඇති බවයි.
මෙම තත්ත්වය හේතුවෙන් යුරෝපා සංගමයේ රටවල් 14ක් පුරා විසිරී සිටින, 80,000කට අධික පිරිසකට රැකියා සපයන දේශීය ටයර් නිෂ්පාදන කර්මාන්තයට දැඩි ආර්ථික හානියක් සිදුවෙමින් පවතින බව ද ඔවුහු අවධාරණය කරනවා.
මෙම අවසන් තීරණයත් සමඟ ඉදිරියේදී චීන ටයර් නිෂ්පාදකයන්ට යුරෝපා වෙළඳපොළ වෙත භාණ්ඩ අපනයනය කිරීමේ පිරිවැය සැලකිය යුතු ලෙස ඉහළ යනවා.
එලෙසම ටයර් නිෂ්පාදනය සඳහා යොදාගනු ලබන ස්වාභාවික රබර් සහ කෘතිම රබර් සඳහා පවතින ඉල්ලුමට ද මෙයින් සෘණාත්මක බලපෑමක් එල්ල වනු ඇතැයි ආර්ථික විශ්ලේෂකයෝ පුරෝකථනය කරනවා.
