කොළඹ ප්‍රසිද්ධ හෝටලයකදී නෙදර්ලන්ත කාන්තාවකට අකරතැබ්බයක්

පසුගිය 11 වන දින සවස් කාලයේ කොළඹ කොටුවේ පිහිටි ප්‍රධාන පෙලේ හෝටල් කාමරයක රැඳී සිටි නෙදර්ලන්ත ජාතික කාන්තාවකගේ මුදල් පසුම්බියක තිබූ මුදල් සොරාගෙන ඇති බවට කොටුව පොලිස් ස්ථානයට ලැබුණු පැමිණිල්ලක් මත සිදු කරනු ලැබූ විමර්ශනයකට අනුව එම හොටලේම සේවකයෙක් අත්අඩංගුවට ගෙන තිබෙනවා.

මෙම විදෙස් ජාතික කාන්තාව තවත් කාන්තාවක් සමඟ අදාල හෝටලයේ විශේෂ අමුත්තන් ලැඟුම් ගන්නා කාමරයක නවාතැන්ගෙන සිට ඇති අතර, ඇයගේ මුදල් පසුම්බියේ තිබූ මෙරට මුදලින් රුපියල් 330,000 ක් පමණ අස්ථානගත වී ඇති බවට පසුගිය 13 වැනිදා කොටුව පොලිසිය වෙත පැමිණිල්ලක් ඉදිරිපත් කර තිබුණා.

අත්අඩංගුවට ගත් සැකකරු වයස අවුරුදු 41 ක් වන කඳාන ප්‍රදේශයේ පදිංචිකරුවෙක්.

සැකකරුගෙන් සිදු කල ප්‍රශ්න කිරීමේදී විදෙස් ජාතික කාන්තාවන් එහි කාමරයේ නොමැති අවස්ථාවක මෙම සොරකම සිදුකර ඇති බවත් සොරාගත් විදෙස් මුදල් ජා ඇල ප්‍රදේශයේ පිහිටි මුල්‍ය ආයතනයකින් මාරුකර ඇති බවටත් අනාවරණය වී තිබෙනවා.

අත්අඩංගුවට ගත් සැකකරු අද (14) කොටුව මහේස්ත්‍රාත් අධිකරණයට ඉදිරිපත් කිරීමට නියමිත අතර කොටුව පොලිසිය වැඩිදුර විමර්ශන මෙහෙයවනු ලබනවා.