රක්ෂිත බන්ධනාගාරගතකර සිටින ශ්රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්රී නාමල් රාජපක්ෂ අද (16) කොළඹ කොටුව මහේස්ත්රාත් අධිකරණය හමුවට ඉදිරිපත් කිරීමට නියමිතයි.
ඒ කොටුව මහේස්ත්රාත් පසන් අමරසේන පෙරේදා කොළඹ රිමාන්ඩ් බන්ධනාගාර අධිකාරිවරයාට ලබාදුන් නියෝගයකට අනුවයි.
ශ්රී ලංකන් ගුවන් සමාගම සඳහා ගුවන්යානා මිලදී ගැනීමේ ක්රියාවලියේදී සිදුවූයේ යැයි කියන මූල්ය අක්රමිකතාවලට අදාළව පවතින මුදල් විශුද්ධිකරණ නඩුවේ සැකකරුවෙකු ලෙස පාර්ලිමේන්තු මන්ත්රී නාමල් රාජපක්ෂ නම් කිරීමට නීතිපති දෙපාර්තමේන්තුව පසුගියදා පියවර ගෙන තිබුණා.
විමර්ශන නිලධාරීන් ඉදිරිපත් කළ විමර්ශන ගොනු සලකා බැලූ අතිරේක සොලිසිටර් ජෙනරාල් දිලීප පීරිස් අලුත්කඩේ ප්රධාන මහේස්ත්රාත් අධිකරණය පවතින නඩුවේ මෙන්ම කොටුව මහේස්ත්රාත් අධිකරණය හමුවේ පවතින නඩුවේ ද සැකකරුවෙකු ලෙස නාමල් රාජපක්ෂ නම් කිරීමට උපදෙස් ලබා දී තිබුණා.
නීතිපති උපදෙස් සහ ඒකාබද්ධ විමර්ශනයක් අනුව එයාර් බස් ගනුදෙනුවට අදාළව අල්ලස් ලබා ගැනීමේ චෝදනාව මත අල්ලස් හෝ දූෂණ චෝදනා විමර්ශන කොමිෂන් සභාව මගින් නාමල් රාජපක්ෂ පසුගියදා අත්අඩංගුවට ගෙන කොළඹ ප්රධාන මහේස්ත්රාත් අධිකරණය හමුවට ඉදිරිපත් කිරීමෙන් පසුව අනිද්දා දක්වා රක්ෂිත බන්ධනාගාරගත කෙරුණා.
