ඕමාන තානාපතිවරයා ලෙස ව්‍යාජව පෙනී සිටි පුද්ගලයෙක් ඉන්දීය පොලිසිය විසින් අත්අඩංගුවට ගෙන තිබෙනවා.
උත්තර ප්‍රදේශ්හි ගාසියාබාද්හි දී මෙම පුද්ගලයා අත්අඩංගුවට ගෙන ඇති බවයි එරට මාධ්‍ය වාර්තා සඳහන් කළේ.
මෙම සැකකරු අත්අඩංගුවට ගන්නා අවස්ථාවේ දී ඔහු සන්තකයේ තිබී නවීන පන්නයේ මර්සිඩීස් බෙන්ස් මෝටර් රථයක්, හැඳුනුම්පතක් සහ ඕමාන තානාපති ලෙස නම් කළ විසිටින් කාඩ් 46ක් ද පොලිසිය සොයාගෙන තිබෙනවා.
මෙලෙස අත්අඩංගුවට ගැනුණු සැකකරු 66 හැවිරිදි වියේ පසුවන ක්‍රිෂ්ණා ශේඛර් රානා නැමැත්තෙකු බවට ලෙස හඳුනාගෙන ඇති අතර මොහු දිල්ලියේ අමර් ජනපදයේ පදිංචිකරුවෙක් බවයි හෙළිව ඇත්තේ.
මෙම සැකකරු සත්ව විද්‍යාව පිළිබඳ මහාචාර්යවරයෙක් ලෙස කටයුතු කර ඇති අතර, විශ්‍රාම ගැනීමෙන් පසු, විත්තිකරු 2015 සිට 2018 දක්වා මධ්‍යම පරිසර අමාත්‍යාංශයේ තක්සේරු අධිකාරී ලෙස කටයුතු කට තිබෙනවා.
මෙම පුද්ගලයා තමා ඕමාන තානාපතිවරයා බවත්, ඒ අනුව තමන්ට පොලිස් ආරක්ෂාව ලබාදෙන ලෙසට ගාසියාබාද් පොලිසියට ලිපියක් යොමුකර ඇති බවයි වාර්තා වන්නේ.
සැකකරු විසින් එලෙස ඉදිරිපත් කරන ලද ලේඛන සැක සහිත බව සිතූ පොලිසිය ඒ පිළිබඳව සිදුකළ සොයා බැලීමේ දී අනාවරණය වී ඇත්තේ ඔහු ඕමාන තානාපති ලෙස ව්‍යාජව පෙනී සිටින අයෙකු බවයි.
ඒ, අනුව සැකකරු අත්අඩංගුවට ගැනීමෙන් පසු තමන් සිදුකළ වංචාව පිළිබඳව පාපොච්චාරණය කර තිබෙනවා.
