ගාසා හි අල්-ෂිෆා රෝහලේ සිටින කුඩා ළදරුවන් ඉන් ඉවත් කිරීම සඳහා සහාය වීමට එකඟ වූ බව ඊශ්‍රායල හමුදාව පවසනවා.
විදෙස් මාධ්‍ය පවසන්නේ අලුත උපන් බිළිඳුන් 20 දෙනෙකු පමණ මේ වනවිට එම රෝහලේ ශල්‍යාගාරයක තබා ඇති බවයි.
මේ අතර අල්-ෂිෆා රෝහලට විදුලිය නොමැතිකම හේතුවෙන් රෝහලේ සිටි නොමේරූ ළදරුවන් දෙදෙනෙකු මිය ගිය බව එහි වෛද්‍ය කණ්ඩායමක් පවසනවා.
ගාසා තීරයේ විශාලතම රෝහල වන අල්-ෂිෆා වෙත ප්‍රහාර එල්ල කළ බවට එල්ලවන චෝදනා ඊශ්‍රායල හමුදාව ප්‍රතික්ෂේප කර ඇති නමුත් එම ප්‍රදේශයේ හමාස් සටන්කාමීන් සමඟ ගැටුම් ඇතිකරගත් බවට පිළිගෙන තිබෙනවා.
කෙසේ වෙතත් අල් ජසීරා පුවත් සේවය සඳහන් කළේ ඊශ්‍රායල යුද ටැංකි විසින් ගාසාවේ අල්-ෂිෆා රෝහල වටකර ඇති බවයි.
පසුගිය ඔක්තෝබර් 07 වැනිදා සිට ගාසා තීරයට එල්ලකරන ඊශ්‍රායල ප්‍රහාරවලින් අවම වශයෙන් පලස්තීනුවන් 11,078ක් මිය ගොස් ඇති බවයි වාර්තා වන්නේ.
කෙසේ වෙතත් ගාසා සෞඛ්‍ය අමාත්‍යාංශයේ යාවත්කාලීන කිරීම් ප්‍රමාද කරමින් සෙනසුරාදා සිට රෝහල් කිහිපයක් සමඟ පැවති සම්බන්ධතා බිඳවැටී ඇති බවයි වාර්තා වන්නේ.
මේ අතර ගාසා තීරයේ වහාම සටන් විරාමයක් ඉල්ලා නිව් යෝර්ක්, ලන්ඩන්, පැරිස්, බැග්ඩෑඩ්, කරච්චි, බර්ලින් සහ එඩින්බරෝ ඇතුළු ලොව පුරා නගරවල විරෝධතා පා ගමන් සංවිධානය කර තිබුණා.
