දෙරට අතර ආර්ථික, සමාජයීය හා කර්මාන්ත යන ක්ෂේත්රවලට අදාළ අවබෝධතා ගිවිසුම් කිහිපයකට චීනය සමග අත්සන් තබා තිබෙනවා.
ජනාධිපති මාධ්ය අංශය නිවේදනය කළේ; චීනයේ සිව් දින රාජ්ය සංචාරයක නිරත ජනාධිපති අනුර කුමාර දිසානායක මහතා සහ චීන ජනාධිපති ෂී ජින් පිං (Xi Jinping) මහතා අතර නිල හමුව අද (15) පස්වරුවේ චීන මහජන ශාලාවේ දී පැවැත්වුණු අවස්ථාවේ දී මෙම ගිවිසුම් අත්සන් තැබුණු බවයි.
චීන මහජන ශාලාව වෙත පැමිණි ජනාධිපතිවරයා ව චීන ජනාධිපති විසින් ඉතා උණුසුම් ලෙස පිළිගනු ලැබූ අතර ආචාර වෙඩිමුර සහිතව ඉතා අභිමානවත් අයුරින් එම පිළිගැනීමේ උත්සවය සංවිධානය කර තිබුණා.
අනතුරුව රාජ්ය නායක දෙපළ අතර සුහද කතාබහකින් පසු දෙරට අතර ද්විපාර්ශ්වික සාකච්ඡා ආරම්භ කෙරුණා.
සංවර්ධනයේ නව යුගයක් සඳහා ශ්රී ලංකාව හා එක්ව කටයුතු කිරීමට සූදානම් බව චීන ජනාධිපතිවරයා මෙහිදී අවධාරණය කළා.
සමීප මිත්ර රාජ්යයන් ලෙස චීනය සහ ශ්රී ලංකාව අතර පවතින දීර්ඝකාලීන සබඳතාව ද සිහිපත් කළ ජනාධිපති ෂී ජින් පිං මහතා ඉදිරියට ද ශ්රී ලංකාව සමග නිරන්තර සහයෝගයෙන් කටයුතු කිරීමට සූදානම් බව ප්රකාශ කළා.
රාජ්ය නායක දෙපළ අතර නිල හමුවෙන් පසු දෙරට අතර ආර්ථික, සමාජයිය හා කර්මාන්ත යන ක්ෂේත්රවලට අදාළ අවබෝධතා ගිවිසුම් කිහිපයකට අත්සන් තැබීම ද සිදු කෙරුණා.
විදේශ කටයුතු, විදේශ රැකියා හා සංචාරක අමාත්ය විජිත හේරත්, ප්රවාහන හා මහාමාර්ග සහ වරාය හා සිවිල් ගුවන්සේවා අමාත්ය බිමල් රත්නායක, රජයේ ප්රවෘත්ති අධ්යක්ෂ ජනරාල් එච්. එස්. කේ. ජේ බණ්ඩාර යන මහත්වරු ද මෙම අවස්ථාවට එක්ව සිටියා.
