ජීවිතාන්තය දක්වා සිරදඬුවම් නියමව වැලිකඩ බන්ධනාගාරයේ චැපල් වාට්ටුවේ රඳවා සිටි සිරකරුවන් 13 දෙනෙකු පසුගිය සැප්තැම්බර් 20 වන දින සිට බන්ධනාගාරයේ වහලයක් මතට නැග උද්ඝෝෂණය කිරීම හේතුවෙන් බන්ධනාගාර ගොඩනැගිල්ලට කෝටි හැටකට අධික අලාභයක් සිදුවීම සම්බන්ධයෙන් විමර්ශන ආරම්භ කළ බව බොරැල්ල පොලිසිය කොළඹ අතිරේක මහෙස්ත්රාත් අධිකරණය හමුවේ ඊයේ (පෙබ. 24) කරුණු වාර්තා කළේ ය.
වැලිකඩ බන්ධනාගාරයේ ප්රධාන ජේලර් ජයකොඩිගේ ප්රියංකර මහතා විසින් කරනු ලැබූ පැමිණිල්ලකට අනුව මෙම විමර්ශනය ආරම්භ කළ බවත් තක්සේරු වාර්තාවලට අනුව රුපියල් 605,489,500.04 අලාභයක් එම උද්ඝෝෂණයේදී බන්ධනාගාරයට සිදුවී ඇති බව බොරැල්ල පොලිසිය අධිකරණයට දැනුම් දුන්නේ ය.
පසුගිය 2021 සැප්තැම්බර් මස 20 වන දින සිට ඔක්තෝබර් මස 28 වන දින දක්වා අතර කාලය තුළ මෙම රැඳවියන් දහතුන්දෙනා විසින් බන්ධනාගාරයේ වහලය උඩට නැගී උද්ඝෝෂණය සිදුකර ඇති බව ත් එහිදී වහලයේ උළුකැට, විදුලි පද්ධතිය හා වඩු අංශයට අලාභ හානි සිදුවී ඇති බවට අනාවරණය වන බව ත් එසේ ම හානි වූ ගොඩනැගිල්ල මිල කළ නොහැකි පෞරාණික ගොඩනැගිල්ලක් බවත් එම ගොඩනැගිල්ලේ මහල් තුනකට මෙම උද්ඝෝෂණය හේතුවෙන් හානි සිදුවී ඇති බව ත් බොරැල්ල පොලිසිය අධිකරණය හමුවේ කරුණු දැක්වීය.
ජීවිතාන්තය දක්වා සිරදඬුවම් නියමව සිටින මංජුල සිසිර කුමාර, නිමල් කොස්තා, සාගර කැලුම්, සඳරුවන් කුමාර, පාලිත මදුරංග, නිමල් ප්රේමචන්ද්ර, රන්ජිත් උපාලි, එස්.ඩී. සඳරුවන්, කේ.සී. රොෂාන්, අජිත් කුමාර, ආර්.එම්. කරුණාතිලක, එම්. සිල්වා අජිත් ප්රසන්න යන සැකකරුවන්ට එරෙහිව ඉදිරියේදී පියවර ගන්න බව බොරැල්ල පොලිසිය අධිකරණය හමුවේ පැවසීය.
මෙම සිද්ධිය සම්බන්ධයෙන් සාක්ෂිකරුවන් තිදෙනෙකු ඉදිරිපත් කිරීමට අපේක්ෂා කරන බව ත් මෙම සැකකරුවන් දහතුන්දෙනාට එරෙහිව පොදු දේපළ පනත යටතේ චෝදනා ගොනු කිරීමට කටයුතු කරන බවත් බොරැල්ල පොලිසිය අධිකරණය හමුවේ වැඩිදුරට ත් පැවසීය.
