බස් රථයක් තුළ දී සිසුවියකට අතවර කළ බව කියන පුද්ගලයෙක් මාතර කොට්ඨාස ළමා හා කාන්තා අපයෝජන නිවාරණ ඒකකයේ නිලධාරීන් විසින් අත්අඩංගුවට ගෙන තිබෙනවා.
මෙලෙස අත්අඩංගුවට ගෙන ඇත්තේ ජනප්‍රිය කොරියන් භාෂා ගුරුවරයෙකු බවයි තොරතුරු වාර්තා වුණේ.
ගාල්ල සිට මාතරට ධාවනය වෙමින් තිබූ බස් රථයක් තුළ දී සැකකරු උසස් පෙළ සිසුවියක්ව මෙලෙස අතවරයට ලක්කර ඇති බවයි වාර්තා වන්නේ.
මෙම පුද්ගලයා බස් රථය තුළ අසුන්ගෙන සිටි සිසුවියගේ පපු ප්‍රදේශය සහ කළවා ප්‍රදේශ ස්පර්ශ කරමින් මෙලෙස අතවරයට ලක්කර තිබෙනවා.
එම අවස්ථාවේ දී සිසුවිය විසින් ඔහුට පහර දී ඇති අතර, එම අවස්ථාවේ දී බස් රථය තුළ සිටි මගීන් විසින් සැකකාර කොරියන් භාෂා ගුරුවරයාගේ හැඳුනුම්පත ලබාගෙන සිසුවිය සමඟ පොලිසිය ඉදිරිපත් කිරීමටයි කටයුතු කර ඇත්තේ.
පසුව සැකකරු අත්අඩංගුවට ගැනීමට විමර්ශන සිදුකරන අවස්ථාවේ ඔහු පළාගොස් සැඟව සිට ඇති අතර, කෙසේ වෙතත් ඔහුව අත්අඩංගුවට ගැනීමට පොලිස් නිලධාරීන්ට හැකියාව ලැබී තිබෙනවා.
මෙලෙස අත්අඩංගුවට ගැනුණු සැකකරු 37 හැවිරිදි වියේ පසුවන දෙදරු පියෙක් බවයි වාර්තා වුණේ.
සැකකරු අද මාතර මහේස්ත්‍රාත් අධිකරණයට ඉදිරිපත් කිරීමට නියමිතයි.
