කාර්මික දෝෂයක් හේතුවෙන් මන්නාරම දකුණු මුහුදු ප්රදේශයට පාවි ආ ටග් යාත්රාව සහ බත්තල යථා තත්වයට පත්කිරීම සඳහා නාවික හමුදා සහාය ලබාදී තිබෙනවා.
‘Atulya’ නැමති බත්තල රැගත් ‘Avadh’ නමැති ටග් යාත්රාව මාලදිවයිනේ සිට ඉන්දියාව වෙත යාත්රා කරමින් තිබියදීයි කාර්මික දෝෂයක් හේතුවෙන් ආපදාවට පත්ව නඩුකුඩා වෙරළ ප්රදේශය ඊයේ පස්වරුවේ පාවී පැමිණ ඇත්තේ.
ඉන්දීය හා ඉන්දුනීසියානු ජාතික කාර්යය මණ්ඩලයේ 9 දෙනෙකුගෙන් සමන්විත එම ටග් යාත්රාව නිසි ක්රමවේදයකින් යුතුව යථා තත්වයට පත්කිරීමට අවශ්ය සම්බන්ධීකරණ කටයුතු මේ වන විට කොළඹ සමුද්රීය සෙවීම් සහ මුදවා ගැනීම් සම්බන්ධීකරණ මධ්යස්ථානයේ සම්බන්ධීකරණයෙන් සිදු කරමින් පවතිනවා.
නාවික හමුදාව සඳහන් කළේ ටග් යාත්රාවේ කාර්මික දෝෂයක් හේතුවෙන් එය සහ බත්තල වයඹ මුහුදු ප්රදේශයට පාවී එන බවට, චෙන්නායි සමුද්රීය සෙවීම් සහ මුදවා ගැනීම් සම්බන්ධීකරණ මධ්යස්ථානය (MRCC Chennai) මඟින්, කොළඹ සමුද්රීය සෙවීම් සහ මුදවා ගැනීම් සම්බන්ධීකරන මධ්යස්ථානය වෙත පෙරේදා (06) දැනුම් දීමක් සිදු කර තිබූ බවයි.
ඒ අනුව, නාවික හමුදාධිපතිවරයාගේ උපදෙස් පරිදි, නාවික හමුදාව විසින් ආපදාවට පත් ටග් යාත්රාවේ මෙහෙයුම් සමාගම වෙත සිද්ධිය දැනුම්දී, එම යාත්රාව මුදවා ගැනීමේ මෙහෙයුම් සඳහා එහි දේශීය නියෝජිතයා මඟින් වෙනත් ටග් යාත්රාවක් යොමු කරන ලෙස දැනුම් දීමක් සිදු කර තිබෙනවා.
අයහපත් කාලගුණික තත්ත්වය හේතුවෙන් මුහුදේ පවතින රළු ස්වභාවය සහ සුළං තත්වය හමුවේ ආපදාවට පත් ටග් යාත්රාව සහ බත්තල, ඊයේ පස්වරුව වන මන්නාරම දකුණ නඩුකුඩා වෙරළ ප්රදේශයට පාවී පැමිණ තිබුණා.
එම ටග් යාත්රාව යථා තත්වයට පත්කිරීම සඳහා අවශ්ය සම්බන්ධීකරණ කටයුතු මේ වන විට කොළඹ සමුද්රීය සෙවීම් සහ මුදවා ගැනීම් සම්බන්ධීකරන මධ්යස්ථානයේ සම්බන්ධීකරනයෙන් සිදු කෙරෙමින් පවතිනවා.
මෙම ටග් යාත්රාවේ කාර්යය මණ්ඩලය වෙත අවශ්ය සහාය ලබාදීම සඳහා ශ්රී ලංකා නාවික හමුදාව සූදානමින් සිටින අතර, ටග් යාත්රාව සහ බත්තල මේ වන විට ස්ථානගතව ඇති වෙරළ ප්රදේශය පිළිබඳව ද විශේෂ අවධානයකින් කටයුතු කරනු ලබන බවයි නාවික හමුදාව සඳහන් කළේ.
