ඉකුත් දා අවසන් වූ 5 වසර ශිෂ්‍යත්ව විභාගයේ කලින් ප්‍රශ්න තුනක් පිට වූ බව කියන පළමු ප්‍රශ්න පත්‍රය සඳහා යළි විභාගයක් පවත්වන ලෙස නියෝග නිකුත් කරන්නැයි ඉල්ලා එම විභාගයට ඉදිරිපත් වූ සිසු සිසුවියන් සහ ඔවුන්ගේ දෙමව්පියන් විසින් ඉදිරිපත් කළ මූලික අයිතිවාසිකම් පෙත්සම් හතරක් පිළිබඳ විභාගයට ගත් අවස්ථාවේ දී යම් සමථයක් තිබේ නම් හෙට (18) දින අධිකරණයට දැනුම් දෙන ලෙස විනිසුරු මඬුල්ල විසින් පාර්ශ්වකරුවන්ට නියෝග කරනු ලැබුවා.
විනිසුරු මඬුල්ල එම නියෝගය කළේ අද (17) ඒ සම්බන්ධයෙන් ඉදිරිපත් කර ඇති පෙත්සම් හතරක් ශ්‍රේෂ්ඨාධිකරණය හමුවේ සලකා බැලු අවස්ථාවේ දීයි.
යසන්ත කෝදාගොඩ, කුමුදුනී වික්‍රමසිංහ සහ අර්ජුන ඔබේසේකර යන අයගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු ඉදිරියේ පෙත්සම් විභාගය තෙවැනි දිනටත් හෙට පැවැත්වීමට නියමිතයි.
අද දින පෙත්සම්කාර පාර්ශ්වය නීතිඥවරු විසින් කරුණු ඉදිරිපත් කිරීම අවසන් කළ අතර අද දින වග උත්තරකර පාර්ශ්වය වෙනුවෙන් කරුණු ඉදිරිපත් කිරීමට නියමිත ව තිබෙනවා.
