2024 හොංකොං සික්සස් ශූරතාවය දිනාගන්නට ශ්‍රී ලංකා කණ්ඩායම මීට සුළු මොහොතකට පෙර සමත් වුණා.
ඒ, අවසන් මහා තරගයේ දී ප්‍රබල පාකිස්ථාන කණ්ඩායම කඩුලු 03කින් පරාජය කරමින්.
මෙම තරගයේ කාසිය වාසිය දිනාගත් ශ්‍රී ලංකාව පළමුව පන්දුවට පහරදීමේ අවස්ථාව පාකිස්ථානයට ලබා දුන්නා.
ශ්‍රී ලංකා ක්‍රීඩකයින් ගත් එම තීරණය නිවැරදි තීරණයක් බවට පත්කරගනිමින් පාකිස්ථාන ඉනිම පන්දුවාර පහයි පන්දු දෙකක් තුළ ලකුණු 72 කට සීමා කරන්නට සමත් වුණා.
අනතුරුව ලකුණු 73ක ජයග්‍රාහි ඉලක්කයක් හඹා ගිය ශ්‍රී ලංකාව එම ඉලක්කය ඉනිමේ අවසන් පන්දුවාරය තුළ පසුකර යමින් අවසන් මහා තරගය ජයග්‍රහණය කළා.
තරගවලියේ වීරයා ලෙස ශ්‍රී ලංකා ක්‍රීඩක තරිඳු රත්නායක සම්මාන හිමිකරගත් අතර, අවසන් තරගයේ වීරයා ධනංජය ලක්ෂාන්.
මෙම ජයග්‍රහණයත් සමඟ ශ්‍රී ලංකාව හොංකොං සික්සස් ශූරතාවය දිනාගත් දෙවන අවස්ථාව මෙය වනවා.
ශ්‍රී ලංකාව මීට පෙර 2007 වසරේ දී මෙම ශූරතාවය දිනාගෙන තිබුණා.
හොංකොං සික්සස් ක්‍රිකට් තරගාවලිය මෙවර පැවැත් වුණේ වසර 07ක විරාමයකින් පසුවයි.
