නීතිවිරෝධී ලෙස වැරදි තොරතුරු මෝටර් රථ ප්රවාහන දෙපාර්තමේන්තුවට ඉදිරිපත් කර මෙරටට ගෙන්වීමෙන් පසුව අල්ලස් කොමිසම භාරයට ගන ලැබූ සුඛෝපභෝගී වාහන පහක් ශ්රී ලංකා රේගුව වෙත භාරදෙන ලෙස කොළඹ මහේස්ත්රාත් අධිකරණය නියම කළා.
රුපියල් කෝටි 60 ක පමණ වටිනාකමකින් යුත් මෙම වාහන නීතිවිරෝධී ලෙස මෙරටට ගෙන ඒම නිසා රජයට රුපියල් මිලියන 300 පමණ බදු අහිමි වූ බවත් අල්ලස් කොමිසම සිදු කළ විමර්ශනවල දී හෙළි වී තිබුණා.
මෙම වාහන සම්බන්ධයෙන් සිදුකරන විමර්ශනයට අදාළ ව මීට පෙර අධිකරණය විසින් නිකුත් කරනු ලැබූ නියෝග මත ඒවා අත්අඩංගුවට ගෙන තම බාරයට ගැනීමට අල්ලස් කොමිසම විසින් කටයුතු කර ඇති බවයි අධිකරණය හමුවේ දී අනාවරණය වූයේ.
ඉන් අනතුරුව වැඩිදුර විමර්ශන සිදු කිරීමට අවශ්ය බවට අල්ලස් කොමිසම කළ දැනුම්දීම පිළිගත් කොළඹ ප්රධාන මහේස්ත්රාත් තිළිණ ගමගේ අදාළ වාහන ශ්රී ලංකා රේගුවට බාරදෙන ලෙසත් නියෝග කළා.
