සිංගප්පූරුවේ දීර්ඝ කාලයක් අගමැති ධුරයේ කටයුතු කළ ලී සියෙන් ලූන්ග් සිය ධුරයෙන් ඉල්ලා අස්වීමට තීරණය කර තිබෙනවා.
ඒ,අනුව එරට දේශපාලන යුගයක අවසානය සනිටුහන් වන බවයි විදෙස් මාධ්‍ය වාර්තා කළේ.
වසර 20ක පාලන බලයෙන් පසු, ලී සියෙන් ලූන්ග්, අද (15) රාත්‍රියේ නියෝජ්‍ය අගමැති සහ මුදල් අමාත්‍ය ලෝරන්ස් වොන්ග් වෙත නිල වශයෙන් පාලන බල භාරදෙනු ඇති බවයි වාර්තා වන්නේ.
අගමැතිවරයා ලෙස ඔහු පසුගිය සති අන්තයේ දේශීය මාධ්‍ය සමඟ අවසන් සම්මුඛ සාකච්ඡාවට එක්වෙමින් සිංගප්පූරු වැසියන්ගේ සහයෝගයට ස්තූතිය පළකර සිටියා.
“මම අනිත් හැමෝටම වඩා වේගයෙන් දුවන්න උත්සාහ කළේ නැහැ. මම හැමෝවම මාත් එක්ක දුවන්න පුළුවන් තත්ත්වයට ගේන්න උත්සාහ කළා,” යනුවෙන් ඔහු එහිදී පැවසුවා.
1984 දී පසුපෙළ මන්ත්‍රීවරයකු ලෙස දේශපාලනයට සම්බන්ධ වූ ලී සියෙන් ලූන්ග් 2004 දී සිංගප්පූරුවේ නායකත්වය ගැනීමට පෙර සිංගප්පූරුවේ දෙවන අග්‍රාමාත්‍ය ගොහ් චොක් ටොං යටතේ ඉහළ නිලතල දැරුවා.
සිංගප්පූරුවේ ආර්ථිකය විවිධාංගීකරණය වී වර්ධනයවීම, දිවයින ජාත්‍යන්තර මූල්‍ය බලාගාරයක් සහ ඉහළම සංචාරක ගමනාන්තයක් බවට පරිවර්තනය වීම, ගෝලීය මූල්‍ය අර්බුදය සහ කෝවිඩ් වසංගතය හරහා රට නිසි ලෙස මෙහෙයවීම සම්බන්ධයෙන් ලී සියෙන් ලූන්ග්ගේ රජයට ගෞරවය හිමි වනවා.
