සම්බා සහ කීරි සම්බාවල උපරිම සිල්ලර මිල වහාම ඉවත් කරන්න – සහල් නිෂ්පාදකයින් කියයි

රජය විසින් නියමකර ඇති උපරිම සිල්ලර මිලට සම්බා සහ කීරි සම්බා සහල් නිකුත් කිරීමට කිසිඳු නිෂ්පාදකයෙකුට හැකියාව නොමැති බව එක්සත් සහල් නිෂ්පාදකයන්ගේ සංගමය පවසනවා.

එම සංගමයේ සභාපති මුදිත පෙරේරා පවසන්නේ මේ වනවිට පවතින වී මිලත් සමඟ එලෙස උපරිම සිල්ලර මිලට සම්බා සහ කීරි සම්බා සහල් නිකුත් කිරීමට හැකියාවක් නොමැති බවයි.

අද (14) පෙරවරුවේ කැඳවා තිබූ මාධ්‍ය හමුවක දී සභාපතිවරයා මේ බව සඳහන් කළා.

අද වනවිට සම්බා වී කිලෝවක මිල රුපියල් 140කට ආසන්න වී ඇති බව සඳහන් කළ ඔහු කීරි සම්බා වී කිලෝවක මිල රුපියල් 160 ඉක්මවා ගොස් ඇති බවයි ඔහු පවසන්නේ.

සභාපතිවරයා වැඩිදුරටත් සඳහන් කර සිටියේ රුපියල් 160 හෝ ඊට වැඩි මුදලකට කීරි සම්බා වී කිලෝවක මිලදී ගෙන සහල් කිලෝවක් නිෂ්පාදනය සඳහා රුපියල් 300ක පමණ පිරිවැයක් දැරීමට සිදුවන බවයි.

ඒ හේතුවෙන් කීරි සම්බා සහන කිලෝවක උපරිම සිල්ලර මිලවන රුපියල් 260ක් වැනි මුදලකට එම සහල් වෙළඳපොළට නිකුත් කිරීමට සහල් නිෂ්පාදකයින්ට කිසිඳු හැකියාවක් නොමැති බවයි.

ඒ, අනුව සහල් නිෂ්පාදකයන්ගේ සංගමය රජයෙන් ඉල්ලා සිටින්නේ සම්බා සහ කීරි සම්බා සහල් සදහා පනවා ඇති උපරිම සිල්ලර මිල වහාම ඉවත් කිරීමට කටයුතු කරන ලෙසයි.