රාජ්‍ය සේවකයින් වයස අවුරුදු 60 දී විශ්‍රාම ගැන්වීමට අමාත්‍ය මණ්ඩලය ගනු ලැබූ තීරණය මත නිකුත් කළ ගැසට් නිවේදනය විශේෂඥ වෛද්‍යවරු හා වෛද්‍යවරු සඳහා පමණක් ක්‍රියාත්මක කිරීම වළක්වාලීමින් නිකුත් කර තිබෙන තහනම් නියෝගය ලබන මාර්තු මස 29 වැනිදා දක්වා තවදුරටත් දීර්ඝ කරන ලෙස අභියාචනාධිකරණය අද නියෝග කළා.
වයස අවුරුදු 60 දී තමන්ව විශ්‍රාම ගැන්වීමට එරෙහිව විශේෂඥ වෛද්‍යවරු 176 දෙනෙකු විසින් ගොනුකළ රිට් පෙත්සමක් කැඳවූ අවස්ථාවේදී සෝභිත රාජකරුණා සහ ධම්මික ගනේපොල යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ල විසින් මෙම නියෝගය ප්‍රකාශයට පත් කළා.
පෙත්සම ඊයේ (31) කැදවනු ලැබු අවස්ථාවේදී වගඋත්තරකරුවන් වෙත නොතීසි යැවීමට පියවර ගන්නා ලෙසත් විනිසුරු මඩුල්ල විසින් පෙත්සම්කාර පාර්ශවයට නියම කළා.
ඉන් පසුව මාර්තු මස 24, 28 සහ 29 යන දිනවල පෙත්සම් විභාගය පැවැත්වීමට දින නියම කල විනිසුරු මඩුල්ල දැනට නිකුත් කර තිබෙන අතුරු තහනම් නියෝගය මාර්තු මස 29 වනදා දක්වා දීර්ඝ කරන ලෙසත් නියෝග කළා
පෙත්සම්කරුවන් කියා සිටින්නේ විශේෂඥ වෛද්‍යවරුන්ට සාමාන්‍යයෙන් වයස අවුරුදු 63 දක්වා සේවයේ නිරත වීමට හැකියාව තිබූ බවයි.
එහෙත් 2022-10-17 දින අමාත්‍ය මණ්ඩලය වෛද්‍යවරු වයස අවුරුදු 60 දී විශ්‍රාම ගැන්වීමට තීරණය කල අතර එම තීරණය නීතියට පටහැනි බව පෙත්සම්කාර වෛද්‍යවරු අධිකරණය හමුවේ ප්‍රකාශ කර තිබෙනවා.
