ගැසට් පත්ර මගින් මිල පාලනයෙන් වැළකී ජනතාවට අත්යවශ්ය ආහාර ද්රව්ය 15ක් පමණ නිශ්චිත කාලයකට සාධාරණ අවම මිලට සැපයීම සඳහා තමන් කොළඹ ප්රධාන පෙළේ තොග සහ සිල්ලර වෙළෙඳුන් සමඟ එකඟතාවක් ඇතිකරගත් බව වෙළඳ අමාත්ය ආචාර්ය බන්දුල ගුණවර්ධන මහතා දේශයට පැවසීය.
මේ සම්බන්ධ සාකච්ඡාවට දේශීය වෙළෙඳපළට භාණ්ඩ සපයන ප්රධාන පෙළේ නිෂ්පාදකයන් හා තොග වෙළෙඳුන් 78 දෙනෙක් සහභාගී වූ බවද අමාත්යවරයා කීය.
අසාමාන්ය ලෙස මිල ගණන් ඉහළ නොදමා ඇතැම් භාණ්ඩ වර්ග සඳහා මාස 6ක කාලයක් තුළ නිශ්චිත මිලක් පවත්වාගෙන යාමටද තවත් භාණ්ඩ වර්ග ගණනාවක් සඳහා මාස තුනෙන් තුනට මිල සමාලෝචනය කිරීමටද මෙහිදී වෙළෙඳුන් එකඟ වූ බව අමාත්යවරයා අවධාරණය කළේය.
සහල්, අල, ලූනු, පරිප්පු, සැමන්, හාල්මැස්සන්, සීනි, කිරිපිටි ආදී භාණ්ඩ වර්ග 15ක් මෙම භාණ්ඩ ලැයිස්තුවට අයත්ය. මූලික වශයෙන් මෙම භාණ්ඩ සහන මිලට බෙදාහැරෙන්නේ ස.තො.ස. හා සමුපකාර මගිනි.
රජය නව බද්දක් පැනවූ විටත් විනිමය අනුපාතයේ අගය ඩොලරය රුපියල් 200 ඉක්ම වූ විටත් මෙම මිල ගණන් වෙනස් කළ යුතු බවද අදාළ වෙළෙඳුන් රජයට දන්වා තිබේ.
ඒ සඳහා ආණ්ඩුවේ එකඟතාව පළවූ අතර අවසන් තීරණය රජයේ ජීවන වියදම් කමිටුව හා සාකච්ඡා කොට රටට ප්රකාශ කරන වගද අමාත්ය ගුණවර්ධන පැවසීය.
