චැසි සහ එන්ජින් අංක මකා දමන ලද ඩිෆෙන්ඩර් වර්ගයේ ජීප් රථයක් තම භාරයට ගෙන ඇති වෙන්නප්පුව පොලිසිය පවසනවා.
එම ඩිෆෙන්ඩර් රථය සමග සැකකරුවන් දෙදෙනකු ද මේ වනවිට (06) පොලිස් අත් අඩංගුවට ගෙන ඇති බවයි වාර්තා වන්නේ.
දසත ප්‍රාදේශීය වාර්තාකරු පවසන පරිදි මෙම වැටලීම ඊයේ (05) වෙන්නප්පුව – මිරිස්සන්කොටුව ප්‍රදේශයේ දී සිදු කර තිබෙනවා.
ගිනිඅවි කිහිපයක් නිවසක් තුළ තිබෙන බවට වන තොරතුරක් වෙන්නප්පුව පොලීසියට ලැබී ඇති අතර එය විමර්ශනයට ගිය පොලිස් නිලධාරින්ට නිවසෙහි නවතා තිබූ චැසි අංක රහිත ඩිෆෙන්ඩර් රථය සොයාගැනීමට හැකි ව තිබෙනවා.
නිවසේ හිමිකරු සහ තවත් අයෙකුව සිද්ධිය සම්බන්ධයෙන් අත්අඩංගුවට ගෙන ඇති බවයි වාර්තා වන්නේ.
අත්අඩංගුවට ගෙන ඇති එක් සැකකරුවෙකු පුත්තලම දිස්ත්‍රික්කයේ හිටපු (මියගිය) දේශපාලකයෙකුගේ සමීපයෙකු බවත්, ඔහුගේ දේශපාලන කටයුතු සඳහා විශාල ලෙස මුදල් වියදම් කර ඇති අයෙකු බවත් හෙළි ව තිබෙනවා.
පොලිස් භාරයට ගෙන ඇති ඩිෆෙන්ඩර් රථය එම දේශපාලකයා පරිහරණය කර තිබේ ද යන්න සම්බන්ධයෙන් ද මේ වනවිට විමර්ශන ක්‍රියාත්මක වී ඇති බවත් වාර්තා වනවා.
