විශේෂ වෙළඳ භාණ්ඩ බදු පනතේ නියමයක් අහෝසි කරන්න අනුමැතිය

2023 ජූලි 13 දින අංක 2340/45 දරන අති විශේෂ ගැසට් නිවේදනය මගින් ප්‍රකාශයට පත් කළ 2007 අංක 48 දරන විශේෂ වෙළඳ භාණ්ඩ බදු පනතේ 2 වන වගන්තිය යටතේ නියමය අහෝසි කිරීමට රජයේ මුදල් පිළිබඳ කාරක සභාවේ අනුමතිය හිමි වී තිබෙනවා.

මේ සඳහා අනුමතිය හිමි වුයේ පාර්ලිමේන්තු මන්ත්‍රී ආචාර්ය හර්ෂ ද සිල්වා මහතාගේ සභාපතිත්වයෙන් රජයේ මුදල් පිළිබඳ කාරක සභාව පාර්ලිමේන්තුවේදී රැස්වූ අවස්ථාවේදීයි.

මෙහිදී මෙම නියමය අහෝසි කිරීමට කාරක සභාවේ අනුමතිය හිමි වුව ද බඩඉරිඟු ආනයනය සහ ත්‍රිපෝෂ නිෂ්පාදනය පිළිබඳ සම්පූර්ණ වාර්තාවක් සකස් කරන ලෙස අදාළ නිලධාරීන්ට කමිටුව විසින් උපදෙස් ලබාදී තිබෙනවා. එසේම වසර ගණනාවක් තිස්සේ නිෂ්පාදන ඉලක්කයට වඩා අඩු නිෂ්පාදනයක් පවතින බව කමිටුවට නිරීක්ෂණය වන බවයි මෙහිදී පෙන්වා දුන්නේ. ඉල්ලුම සපුරාලීම සඳහා ප්‍රමාණවත් ත්‍රිපෝෂ ප්‍රමාණයක් සකස් කිරීමට අවශ්‍ය වෙනස්කම් යෝජනා කිරීම සඳහා දීර්ඝ වශයෙන් සාකච්ඡා කිරීමට අවශ්‍ය වන සියලුම පාර්ශව රජයේ මුදල් පිළිබඳ කාරක සභාවට කැඳවන බව ද මෙහිදී කාරක සභාවේ සභාපතිවරයා සඳහන් කළා.

2023 මැයි 17 දින අංක 2332/14 දරන ගැසට් නිවේදනය මගින් ත්‍රිපෝෂ නිෂ්පාදනය සඳහා බඩ බරිගු ආනයනය කිරීමේදී කිලෝග්‍රෑමයක් සඳහා වන විශේෂ වෙළඳ භාණ්ඩ බද්ද රුපියල් 75 සිට රුපියල් 25 දක්වා අඩු කර තිබුණා. මෙම අඩු කිරීම 2023 මැයි මස 18 දින සිට වසරක් වලංගු බව සඳහන් කර තිබූ අතර මෙම නව ගැසට් නිවේදනය මගින් එම කාලසීමාව අවලංගු කිරීම සිදු කර ඇති අතර එම නිසා නැවත බඩ බරිඟු ආනයනය කිරීමේදී කිලෝග්‍රෑමයක් සඳහා වන විශේෂ වෙළඳ භාණ්ඩ බද්ද රුපියල් 75 දක්වා වැඩි වීම සිදු වනවා.

මේ අනුව කමිටුව විසින් මේ පිළිබඳ දීර්ඝ වශයෙන් පරීක්ෂා කර බැලීම සිදු වූ අතර කාරක සභාවේ සභාපති හර්ෂ ද සිල්වා මහතා සඳහන් කළේ එක් ගැසට් පත්‍රයක අඩංගු කරුණු පාර්ලිමේන්තුවේ අනුමතියට ඉදිරිපත් කොට තිබියදී තවත් ගැසට් නිවේදනයක් මගින් පූර්ව ගැසට් නිවේදනයේ කරුණු අවලංගු කිරීමට කටයුතු කිරීම ගැටලු සහගත බවයි.

මේ නිසා මේ පිළිබඳ පැමිණි නිලධාරීන්ගෙන් විමසා සිටි අතර මෙය ප්‍රතිපත්තිමය කරුණු මත සිදු වන බව ඔවුන් පෙන්වා දෙනු ලැබුවා. විශේෂයෙන්ම සෞඛ්‍ය අමාත්‍යාංශය, කෘෂිකර්ම අමාත්‍යාංශය සහ මුදල් අමාත්‍යාංශය මේ සම්බන්ධයෙන් මූලිකත්වය ගන්නා බවයි ඔවුන් සඳහන් කළේ. එසේම ත්‍රිපෝෂ සැකසීමට අවශ්‍ය බඩ ඉරිඟු ගෙන්වීමට සිටින ආනයනකරුවන් පිළිබඳව ද මන්ත්‍රීවරු මෙහිදී විමසීමක් කළා. මේ අනුව මේ සම්බන්ධයෙන් ද සෞඛ්‍ය අමාත්‍යංශය මුල්වී කටයුතු කරන බවයි පැමිණ සිටි නිලධාරීන් සඳහන් කළේ.