නවසීලන්තයේ මුල් පෙළ පිතිකරුවෙකු වන කේන් විලියම්සන් හට ඉන්දියාවට එරෙහිව පැවැත්වීමට නියමිත පළමු ටෙස්ට් තරගය අහිමි ව තිබෙනවා.
පසුගියදා ශ්‍රී ලංකාව සමග පැවති ටෙස්ට් තරගාවලිය අවසන් වනවිට විලියම්සන් හට ඉණ කොටසේ මස් පිඬු වේදනාවක් සමග ආබාධයක් ඇති වුණා.
ඉන් අනතුරුව ඔහු සිය කණ්ඩායම සමග යළි මව් රටට ගිය ද එම රෝගී තත්ත්වය සුව වී නැහැ.
තරග 03කින් සමන්විත ටෙස්ට් තරගාවලියක් එළඹෙන 16 වැනිදා ඉන්දියාවේ පැවැත්වීමට නියමිත අතර ඒ සඳහා මේ වනවිට නවසීලන්ත කණ්ඩායම දිවයිනෙන් පිටත්ව ගොස් තිබෙනවා.
සංචිතයට ඇතුළත් කර සිටින කේන් විලියම්සන් හට සිය කණ්ඩායම සමග ඉන්දියාවට යාමට හැකි වී නැහැ.
ඒ ඔහු තවමත් ඉණෙහි ඇති වූ ආතති තත්ත්වයෙන් පෙළෙන බැවින් බවයි වාර්තා වන්නේ.
කෙසේවෙතත් ඔහු වෙනුවට මාර්ක් චැප්මන් සංචිතයට එක් කර තිබෙනවා.
ටොම් ලැතම් නවසීලන්ත කණ්ඩායම මෙහෙයවනු ඇති.
එමෙන්ම නවසීලන්ත කණ්ඩායමේ මයිකල් බ්‍රේස්වේල් ඉන්දියාවට එරෙහිව පැවැත්වෙන පළමු ටෙස්ට් තරගයට පමණක් ක්‍රීඩා කරන බව ද වාර්තා වනවා.
ඔහු සිය දෙවැනි දරුවාගේ උපත සඳහා සිය මව් රටට යාමට අවශ්‍ය බව කිවි තේරීම් කමිටුවට දන්වා ඇති බවත්; එබැවින් සෙසු තරග දෙක සඳහා මයිකල් බ්‍රේස්වෙල් වෙනුවට ඉෂ් සෝදි එක් කර ඇති බවයි වැඩිදුරටත් පැවසෙන්නේ.
