විදේශ ගමන් බලපත්‍ර සඳහා මාර්ගගත ක්‍රමවේදය ඔස්සේ අයදුම්පත් ලබන සතියේ සිට

විදේශ ගමන් බලපත්‍ර සඳහා වන අයදුම්පත් මාර්ගගත ක්‍රමවේදය ඔස්සේ ලබන බ්‍රහස්පතින්දා (15) සිට ඉදිරිපත් කළ හැකි බව ආගමන විගමන පාලක ජනරාල් හර්ෂ ඉලුක්පිටිය මහතා පවසනවා.

විදේශ ගමන් බලපත්‍ර අයදුම් කිරීමේ මාර්ගගත ක්‍රමයක් ක්‍රියාත්මක කිරීම ශ්‍රී ලංකාවේ රාජ්‍ය සේවාවන් ඩිජිටල්කරණය කිරීම සඳහා ජනාධිපති රනිල් වික්‍රමසිංහ ගෙන ඇති තීරණයේ කොටසක් බවයි ඔහු පෙන්වා දෙන්නේ.

නව ක්‍රියාවලියේ අරමුණ වන්නේ විදේශ ගමන් බලපත්‍ර අයදුම් කිරීමේ ක්‍රියාවලිය විධිමත් කිරීම සහ දින තුනක කාලයක් තුළ විදේශ ගමන් බලපත්‍ර අයදුම්කරුවන්ගේ නිවාස වෙත ලබා දීම සහතික කිරීමයි.

විදේශ ගමන් බලපත්‍ර කාර්යක්ෂමව බෙදා හැරීමට පහසුකම් සැලසීම සඳහා දිවයින පුරා පිහිටි ප්‍රාදේශීය ලේකම් කාර්යාල 50කට අවශ්‍ය පහසුකම් ද සපයා තිබෙනවා.

නව ක්‍රමවේදයට අනුව අයදුම්කරුවන් තම අයදුම්පත් ළඟම ඇති ප්‍රාදේශීය ලේකම් කාර්යාලයට ඉදිරිපත් කර අවශ්‍ය ක්‍රියා පටිපාටි සම්පූර්ණ කිරීමෙන් පසු විදේශ ගමන් බලපත්‍රය කුරියර් සේවාව හරහා ඔවුන්ගේ නිවසටම යැවීමටයි සැලසුම් කර ඇත්තේ.

www.immigration.gov.lk වෙත පිවිස, ‘විදේශ ගමන් බලපත්‍ර සඳහා අයදුම් කරන්න’ තෝරාගෙන සපයා ඇති තොරතුරු වලංගු කිරීමෙන් පුද්ගලයන්ට තම නිවෙස්වල සිටම විදේශ ගමන් බලපත්‍ර සඳහා අයදුම් කළ හැකියි.

පෝරමයේ මෘදු පිටපත උඩුගත කිරීමට පෙර, අයදුම්කරුවන්ට තමන් කැමති කඩිනම් ‘දින 03 සේවාව’ හෝ සම්මත ‘සති 02 සේවාව’ ද යන්න සඳහන් කිරීමට ද හැකියාව පවතිනවා.

මෙයින් පසුව, අයදුම්කරුවන් තම ඇඟිලි සලකුණු ලබා දීම සඳහා ඔවුන්ගේ ප්‍රාදේශීය ලේකම් කාර්යාලයට පැමිණිය යුතු අතර ලංකා බැංකුව විසින් පිරිනමනු ලබන මාර්ගගත ක්‍රමය හරහා අවශ්‍ය ගෙවීම් කළ යුතුයි.

නිවසේදී ක්‍රියාවලිය සම්පූර්ණ කිරීමට නොහැකි අයට අවශ්‍ය ලියකියවිලි ලබා ගැනීමට සහ අවශ්‍යතා සපුරා ගැනීමට ආගමන හා විගමන දෙපාර්තමේන්තුව යටතේ ඇති බලයලත් ඡායාරූප මැදිරියකට පිවිස එක කටයුතු සිදු කර ගැනීමට හැකියාව පවතිනවා.

ප්‍රාදේශීය ලේකම් කාර්යාලයට පැමිණ තම ඇඟිලි සලකුණු ලබා දීමෙන් පසු අන්තර්ජාලය හරහා ගෙවීම් කිරීමේ දුෂ්කරතා ඇති වුවහොත් විකල්ප ගෙවීම් පහසුකම් ද ලබාදී තිබෙනවා.

අයදුම්කරුවන්ගේ ඇඟිලි සලකුණු ඉදිරිපත් කිරීමෙන් පසු ප්‍රාදේශීය ලේකම් කාර්යාලය විසින් නම් කරන ලද අංකයක් ලබා දෙන අතර එය ලංකා බැංකුවට ඉදිරිපත් කර ගෙවීම් සිදු කළ හැකියි. පසුව එම මුදල ආගමන හා විගමන දෙපාර්තමේන්තුවට යොමු කෙරෙනවා.

විදේශ ගමන් බලපත්‍ර නිකුත් කිරීමේ ක්‍රියාවලියේදී බාධා ඇති කරන තැරැව්කරුවන්ගේ ක්‍රියාකාරකම්වලට ප්‍රතිචාර වශයෙන් මෙන්ම ජනතාවගේ පහසුව වෙනුවෙන් මෙම වැඩපිළිවෙල ආරම්භ කර තිබෙනවා.