ජනාධිපති රනිල් වික්‍රමසිංහගේ දැක්මට අනුව 2048 වන විට විදුලියෙන් ක්‍රියාත්මක බස්රථ මෙරට පොදු මගී ප්‍රවාහන සේවයට එක් කිරීමට අපේක්ෂා කරන බව ප්‍රවාහන අමාත්‍යාංශය පවසනවා.
ඊට අදාළ මූලික පියවර ඉදිරි මාස කිහිපය තුළ ක්‍රියාත්මක කිරීමට නියමිත බවත් ප්‍රවාහන අමාත්‍යාංශය සඳහන් කර සිටියා.
මෙරට පොදු ප්‍රවාහන ක්ෂේත්‍රයේ දීර්ඝකාලීනව පවතින ගැටලුවලට විසඳුම් ලබාදෙමින් ජාතික ගමනාගමන ප්‍රතිපත්තියක් හඳුන්වා දීමට සහ පොදු ප්‍රවාහන සේවාව තුළ ඒකාබද්ධ කාලසටහන් සහ විද්‍යුත් ටිකට්පත් හඳුන්වා දීමේ වැඩපිළිවෙළක් ද සැලසුම් කර ඇති බවයි එම අමාත්‍යාංශය පෙන්වා දුන්නේ.
මේ පිළිබඳ සාකච්ඡාවක් ප්‍රවාහන, මහාමාර්ග සහ ජනමාධ්‍ය අමාත්‍ය බන්දුල ගුණවර්ධන, ප්‍රවාහන රාජ්‍ය අමාත්‍ය ලසන්ත අලගියවන්න, ජනාධිපති ලේකම් සමන් ඒකනායක සහ ප්‍රවාහන අමාත්‍යාංශයේ ලේකම් ප්‍රියන්ත මායාදුන්නෙ ඇතුළු නිලධාරීන්ගේ සහභාගිත්වයෙන් ඊයේ (07) ජනාධිපති කාර්යාලයේ දී පවත් වුණා.
මේ වනවිට මගී ප්‍රවාහන ක්ෂේත්‍රයෙහි පවතින කළමනාකාරීත්ව ගැටළු හා අකාර්යක්ෂමතා හේතුවෙන් මගී ජනතාව සහ බස්රථ හිමියන්ට මුහුණදීමට සිදුව ඇති ගැටළු පිළිබඳ මෙහිදී සාකච්ඡා කෙරුණු අතර, නවීන තාක්ෂණය භාවිත කරමින් මගී ප්‍රවාහන ක්ෂේත්‍රයේ ගුණාත්මක භාවය ඇති කිරීමට කටයුතු කිරීමේ අවශ්‍යතාව අවධාරණය කෙරුණා.
මගී ප්‍රවේශ පත්‍ර මිලදී ගැනීම සම්බන්ධව සියලු පාර්ශ්වයන්ට ඇතිවන ගැටලු මගහරවා ගැනීම සඳහා E- ticketing ක්‍රමය යෝජනා වී ඇති බවත්, මේ සඳහා මුදල් අමාත්‍යාංශයේ අනුමැතිය හිමිව ඇති බවත් ප්‍රවාහන අමාත්‍ය බන්දුල ගුණවර්ධන මෙහිදී සඳහන් කළා.
ජාතික බස් සංගම් 07ක් ද මේ වන විට ඒ සඳහා එකඟතාව පළ කර ඇති බවත්, පළාත් මට්ටමින් ද ඒ පිළිබඳ අදහස් ලබාගැනීම කඩිනමින් සිදුකරන බවත් රාජ්‍ය අමාත්‍ය ලසන්ත අලගියවන්න පවසා සිටියා.
එමෙන්ම මෙම වැඩපිළිවෙළ ක්‍රියාත්මක කිරීම සඳහා පළාත් 09ට අදාළව නියෝජිතයන් 09 දෙනෙකු පත් කර ජාතික ගමනාගමන කොමිසන් සභාවට දැනුම් දෙන ලෙස ද රාජ්‍ය අමාත්‍යවරයා විසින් උපදෙස් ලබා දුන්නා.
ඉදිරියේදී බස් රථ සඳහා ප්‍රවාහන බලපත්‍ර ලබාදීමේ දී GPS තාක්ෂණය සහ E- ticketing සේවාව ක්‍රියාත්මක වීම ප්‍රධාන නිර්ණායකයක් ලෙස සලකා බලන බව ද මෙහිදී සඳහන් කෙරුණු අතර, කොට්ටාව බස් නැවතුම්පොළ, මාකුඹුර බහුවිධ මගී ප්‍රවාහන මධ්‍යස්ථානය හා ඒකාබද්ධ කිරීම සඳහා කටයුතු කිරීමට ද යෝජනා වුණා.
wpDiscuz
