ලංකා විදුලිබල මණ්ඩලය පෞද්ගලීකරණය කිරීම නැවතුණු බව ලංවිම පවසනවා.
නිවේදනයක් නිකුත් කරමින් ලංවිම සඳහන් කරන්නේ; සේවාවේ ගුණාත්මකභාවය වැඩි කිරීමටත්, පාරිභෝගික තෘප්තිමත්භාවය ඉහළ අගයක පවත්වාගෙන යාමටත්, ආයතනයට සාධාරණ ලාභයන් ලැබීමටත්, ඉන් සමාජ ආර්ථිකයට ඉහළ ප්‍රතිලාභයක් ලැබීමටත්, සේවකයින්ගේ ජීවන මට්ටම ඉහළ නැංවීමටත් ඕනෑම ආයතනයක් විසින් කාලීන ඇගයීම් සිදු කරමින් නිසි ආයතනික ප්‍රතිසංස්කරණයන් සිදු කිරීම අනිවාර්‍යය බවයි.
නමුත් ලංවිම තුළ එසේ සිදුවිය යුතුව තිබූ වෙනස්කම් දශක ගණනක් පුරාවට ආයතනය තුළින් ම සිදු නොවීමේ ප්‍රතිඵලය වූයේ පසුගිය වසරේ දී බාහිර යාන්ත්‍රණයක් විසින් යෝජනා කරන ලද ප්‍රතිසංස්කරණ ක්‍රියාවලියක් තුළට අනුගත වීමට සිදු වීම බව ලංකා විදුලිබල මණ්ඩලය නිකුත් කළ නිවේදනයේ දැක්වෙනවා.
වත්මන් ජනාධිපතිවරයා යටතේ ලැබූ සමාජ පරිවර්තනීය ජන වරමට අනුව බලශක්ති ක්ෂේත්‍රයේ නිසි ප්‍රතිසංස්කරණයන් සිදු කිරීමට නැවතත් අනගි අවස්ථාවක් උදා වී ඇති බවයි එහි දැක්වෙන්නේ.
නව පුනරුද යුගයක අරුණලු සමගින් මහජන කේන්ද්‍රීය බලශක්ති ක්ෂේත්‍රයක් කරා පියනගන බලශක්ති අමාත්‍යාංශයේ මෙහෙය වීම යටතේ විදුලිබල ක්ෂේත්‍රයේ ප්‍රතිසංස්කරණ පිළිබඳව දැනුවත් කිරීමේ වැඩසටහනක් ලංකා විදුලිබල මණ්ඩලයේ සභාපති සහ අධ්‍යක්ෂ මණ්ඩලය විසින් ලංවිම සමස්ත සේවක මණ්ඩලය ම ආවරණය වන පරිදි පසුගියදා (23) මාර්ගගත ක්‍රමය ඔස්සේ පැවැත්වීමේ දී සාකච්ඡා කර තිබෙනවා.
එබැවින් විදුලි බල පනත අනිවාර්‍යයයෙන් ම සංශෝධනය වන බවත් රජයට අයත් බලාගාර, සම්ප්‍රේෂණ හා බෙදාහැරීම් ජාලය කිසිසේත් පෞද්ගලීකරණය නොවන බවත් සම්පූර්ණයෙන් ම රජයට අයත් ස්වාධීන පද්ධති ක්‍රියාකාරීත්වයක් සහිත ශක්තිමත් තනි ගැනුම්කරු මාදිලියක් තුළ ජනයා සම්ප්‍රේෂණ, බෙදාහැරීම් අංශ මූල්‍ය හා කාර්‍යය පරිපාලන වශයෙන් ස්වාධීන වන යාන්ත්‍රණයක් පුළුල් මහජන හා පාර්ශ්වකරුවන්ගේ උපදේශනයක් තුළ ස්ථාපිත කරමින් ඉදිරි වසර 05 තුළ මේ කලාපයේ අඩුම විදුලි පිරිවැය ඇති රට බවට ශ්‍රී ලංකාව පත් කරන බව ද නව අධ්‍යක්ෂ මණ්ඩලය ලංවිම සේවක මණ්ඩලයට සනාථ වී ඇති බවයි නිකුත් කළ නිවේදනයේ වැඩිදුරටත් දැක්වෙන්නේ.
