රුපියල් කෝටියකට ආසන්න වටිනා කොකේන් මත්ද්‍රව්‍ය තොගයක් සමග සියෙරා ලියොන් ජාතිකයෙකු හා තවත් පුද්ගලයෙකු බොරැල්ල – කොටා පාර ප්‍රදේශයේ දී අත්අඩංගුවට ගත් බව පොලිස් මත්ද්‍රව්‍ය නාශක කාර්යාංශය පවසනවා.
ගාල්ල – පින්නදූව අධිවේගී පිවිසුමේ දී ගාල්ල වරාය පොලිසිය මගින් කොකේන් මත්ද්‍රව්‍ය ග්‍රෑම් 279 ක් (ගුලි 19) සමග අත්අඩංගුවට ගත් සැකකරුවන් දෙදෙනෙකුගෙන් හෙළි වූ තොරතුරු අනුව විදේශීය සැකකරු අත්අඩංගුවට ගත් බව‍යි පොලිසිය පැවසුවේ.
සැකකරු කොකේන් තොගය රැගෙන විත් ඇත්තේ ගුලි වශයෙන් ගිල දමා බවත් ඔහුට විරේක කර ග්‍රෑම් 672ක බරින් යුත් කොකේන් ගුලි 40ක් සොයාගත් බව ද පොලිසිය පවසනවා.
අත්අඩංගුවට ගත් සැකකරු කොල්ලුපිටිය ප්‍රදේශයේ හෝටලයක නවාතැන් ගැන සිට ඇති බවට ද තොරතුරු ලැබී තිබෙනවා.
විදේශික ජාතික සැකකරු වයස අවුරුදු 52ක පුද්ගලයෙකු බවත් සෙසු සැකකරුවන් 24, 28 හා 32 යන වයස්වල පසුවන්නන් බවත් පොලිස් මාධ්‍ය ප්‍රකාශක කාර්‍යාලය නිවේදනය කළා.
සිද්ධිය සම්බන්ධයෙන් පොලිස් මත්ද්‍රව්‍ය නාශක කාර්යාංශය වැඩිදුර විමර්ශන ක්‍රියාත්මක කරනවා.
