“රටේ පවතින තත්ත්වයට තම පක්ෂය හැර අනෙකුත් සියලුම දේශපාලන පක්ෂ වගකිව යුතුයි” – ජනාධිපතිවරයා

රටේ පවතින තත්ත්වයට තම පක්ෂය හැර අනෙකුත් සියලුම දේශපාලන පක්ෂ වගකිව යුතු බව හා අවිගත් කැරැල්ලට තමන්ගේ කිසිඳු සම්බන්ධයක් නැති බව මවා පාමින් ජනතා විමුක්ති පෙරමුණ අද ජනතාව රවටමින් සිටින බව පැවසූ ජනාධිපති රනිල් වික්‍රමසිංහ මහතා එසේනම් ඔවුන් තමන්ගේ නම අවභාවිතා කිරීම වෙනුවෙන් අදාළ පාර්ශ්වයන් වෙතින් වන්දි ඉල්ලා නඩු පැවරිය යුතු බව ප්‍රකාශ කර තිබෙනවා.

ජනතාවට ඉටුකළ නොහැකි පොරොන්දු ලබාදෙමින් ජනතාව මුලා කිරීමේ වරද ජනතා විමුක්ති පෙරමුණ නැවත සිදු කරමින් සිටින බව පැවසූ ජනාධිපතිවරයා අතීත වැරදි පිළිගැනීමට සූදානම් නැති පිරිසකට රටේ අනාගතය භාරදීය හැකි ද කියා ප්‍රශ්න කෙරුණා.

ජනාධිපති රනිල් වික්‍රමසිංහ මේ බව සඳහන් කර සිටියේ Stables at Park Street හි ඊයේ (12) පැවැති ‘පුළුවන් පෙරළිය” වැඩසටහන අමතමින්.

එළැඹෙන ජනාධිතිවරණයේ දී ජනාධිපති රනිල් වික්‍රමසිංහගේ විජයග්‍රහණය තහවුරු කිරීම වෙනුවෙන් සංවිධානය කර තිබූ මෙම හමුවට කොළඹ කවය නියෝජනය කරමින් අතිවිශාල පිරිසක් එක්ව සිටි අතර එහිදී තරුණ තරුණියන් යොමු කළ ප්‍රශ්නවලට ද ජනාධිපතිවරයා සාධනීය පිළිතුරු ලබා දෙනු ලැබුවා.

ආර්ථිකය ගොඩ නැගීමේ දී තමන් හට අසීරු තීරණයක් ගැනීමට සිදු වු බවත් එම හේතුවෙන් තමා හට වැට් බදු අඩු කිරීමට සිදු වූ බවත් ඔහු මෙහිදී ප්‍රකාශ කර සිටියා.

මෙරට ආර්ථිකය යථාතත්ත්වයට පත් කිරීමට තවත් වසර පහක කාලයක් ගතවන අතර ඒ වෙනුවෙන් සැළසුම් සහගත ලෙස කටයුතු කරන බව ජනාධිපතිවරයා මෙම අවස්ථාවට එක් වෙමින් ප්‍රකාශ කළා.