යාපනය ඩෙල්ෆ් දූපතේ නෙඩුන්තීවු ප්රදේශයේ පිහිටි නිවසක් තුල සිටි 05 දෙනෙකු තියුණු ආයුධවලින් කපාකොටා ඝාතනය කර තවත් කාන්තාවකට බරපතල තුවාල සිදුකිරීමේ සිද්ධිය සම්බන්ධයෙන් පොලිස් කණ්ඩායම් 3ක් මේ වන විට විශේෂ පරික්ෂණයක් ආරම්භ කර තිබෙනවා.
සිද්ධියට අදාළව මෙතෙක් කිසිවෙකුත් අත්අඩංගුවට ගෙන නැහැ.
නෙඩුන්තීවු ප්රදේශයේ පිහිටි නිවසක් තුල පුද්ගල මළ සිරුරු ඇති බවට ඩෙල්ෆ් පොලිසියට ඊයේ (22) දින ලැබුණු තොරතුරකට අනුව පොලිස් නිලධාරීන් එම ස්ථානයට ගොස් සිදුකරන ලද සෝදිසියකදී යි මළසිරුරු 05ක් සමග බරපතල තුවාල ලැබූ වයෝවෘධ කාන්තාවක් සොයාගනු ලැබුවේ.
අසල්වැසියෙකු විසින් මිය ගිය අයෙකුට දුරකතන ඇමතුමක් ලබාගත් අවස්ථාවේදී එයට ප්රතිචාර නොලැබීම හේතුවෙන් නිවසට ගොස් පරික්ෂා කිරීමේදී නිවස තුල සිදුව ඇති මෙම ඝාතනයන් දැක ඒ බව පොලිසියට සහ අසල්වාසීන්ට දැනුම් දී තිබෙනවා.
මෙලෙස මිය ගොස් ඇත්තේ කාන්තාවන් තිදෙනෙකු සහ පිරිමි දෙදෙනෙකු යි.
ඔවුන් අතර නිවසේ හිමිකාරිය සහ ඇගේ සහෝදරියන් දෙදෙනා, නිවෙස් හිමිකාරියගේ ස්වාමි පුරුෂයා සහ තවත් ඥාති පුද්ගලයෙකු ඒ අතර වනවා.
එමෙන්ම අදාළ ඝාතනයන් පෙරේදා (21) දින රාත්රියේ හෝ ඊයේ (22) දින අලුයම සිදුව ඇති බවටයි පොලිසිය සැක පළ කරන්නේ.
පහරකෑමෙන් බරපතල තුවාල ලැබූ අවුරුදු 100ක් පමණ වයසැති කාන්තාවක් යාපනය ශික්ෂණ රෝහලේ ප්රතිකාර ලබනවා.
මෙම ඝාතනය සම්බන්ධයෙන් මෙතෙක් කිසිවෙකුත් අත්අඩංගුවට ගෙන නොමැති අතරම උතුරු පළාත් ජ්යේෂ්ඨ නියෝජ්ය පොලිස්පතිවරයාගේ අධීක්ෂණය යටතේ විශේෂ පොලිස් කණ්ඩායම් 3ක් විසින් පුලුල් විමර්ශනයක් මේ වන විට ආරම්භ කර තිබෙනවා.
මේ වන විටත් සැක සහිත පුද්ගලයින් පොලිස් භාරයට ගෙන ප්රශ්න කිරීම් සිදු කරන බවයි අප වාර්තාකරුවන් සඳහන් කළේ.
තියුණු ආයුධවලින් පහරකෑමෙන් මෙලෙස මියගොස් ඇති සියලු දෙනා නෙඩුන්තීවු ප්රදේශයේ පදිංචි අවුරුදු 75 ට වැඩි වයෝවෘද්ධ පුද්ගලයින්.
78 හැවිරිදි වේලායුදම් නාගෙන්ද්ර රත්නම්, 82 හැවිරිදි නාගනිධි බාලසිංහම්, 76 හැවිරිදි නාගසිංහම් කන්මණිපිල්ලෙයි, 83 හැවිරිදි කාතරිකේසු නාගේස්වරී සහ 75 හැවිරිදි එස්. මහාදේවන් නැමති අය මෙලෙස ඝාතනයට ලක්ව තිබෙනවා.
මේ අතර අදාළ ඝාතනයන් සමගම නෙඩුන්තීව් ප්රදේශයේ ජනතාව අතර දැඩි භීතියක් හටගෙන ඇති අතර වහාම ඝාතකයින් නීතිය හමුවට ගෙන ආයුතු බව පවසමින් ප්රදේශවාසීන් රැසක් ඊයේ (22) සවස විරෝධතාවයකද නිරත වුණා.
මෙම ඝාතනයන්ට නිශ්චිතවම හේතුව මෙතෙක් අනාවරන වී නොමැති අතර පරීක්ෂණවලින් පසු මළසිරුරු ඥාතීන් වෙතට භාරදීමට නියමිතයි.
